Цæгат Иры премьер: ХМИ-мæ райстыл тобæ тагъд ист æрцæудзæн

© skgmi-gtuСКГТУ
СКГТУ - Sputnik Хуссар Ирыстон
Рафыссын
Цæгат Ирыстоны хицауады сæрдар радзырдта Уæрæсейы рагондæр металлургон уæлдæр ахуыргæнæндæттæй иумæ абитуриентты райст сæндидзын кæныны къахдзæфтыл

ЦХИНВАЛ, 11 май — Sputnik, Болататы Алина. "Рособрнадзор" æввахс рæстæджы айсдзæн Цæгат-Кавказаг Хæххон-металлургон институтмæ абитериентты райстыл тобæ, фехъусын кодта Цæгат Ирыстоны хицауады сæргълæууæг Тускъаты Таймураз.

Раздæр республикон мыхуыры фæрæзтæ фехъусын кодтой, Ахуырад æмæ зонады къабазы хъусдарды фæдыл федералон службæ кæй сæвæрдта тобæ рагондæр металлургон институтмæ ног ахуыры азы абитуриенттæ райсыныл. Ахæм уынаффæ райст æрцыд, ахуырадон уагдон рæстæгыл кæй нæ сæххæст кодта ведомствæйы домæнтæ, уый тыххӕй. Мадзæлттæ ист æрцыдысты ацы азы 21-28 апрелы ауадзгæ басгæрсты фæстиуджытæм гæсгæ.

Уавæрæн комментаритæ аразгæйæ, Тускъаты Таймураз банысан кодта, ацы тæккæ хицауад кæй уадзы бадзырдтæ Рособрнадзоримæ проблемæ райхалыны фæдыл. Хицауады сæрдар у æнæдызæрдыг, æввахс рæстæджы тобæ ист кæй æрцæудзæн æмæ "университет адарддæр кæндзæн йæ архайд, цæттæ кæндзæн республикæйæн æмæ æнæхъæн бæстæйæн профессионалон кадртæ".

"Уавæр хуыздæр кæны. Республикæйы сæргълæууæг фембæлд Ахуырад æмæ зонады къабазы хъусдарды фæдыл федералон службæйы сæргълæууæгимæ æмæ уавæр ис карз контролы бын. Мæхæдæг дæр уадзын бадзырдтæ ацы уагдоны сæргълæууæджы хæдивæг Сергей Руковичниковимæ. Мах нæ дызæрдыг кæнæм, æввахс рæстæджы кæй райсдзыстæм документ, кæцы ратдзæн фадат рагондæр ахуырадон уагдонæн студенттæ райсын. Уагдон у ахсджиаг, техникон. Ӕмæ экономикæйы райрæзты нырыккон реалитæ хынцгæйæ, тынг ахсджиаг у бæстæ æмӕ республикæйы экономикæйæн", — загъта Тускъаты Таймураз журналисттæн.

Институты ног ректоры æвзæрстты тыххæй та, Цæгат Ирыстоны хицауады сæрдар загъта, кæй нæ аразы прогнозтæ, чи слæудзæн металлургон институты сæргъ.

"Мæ хъуыдымæ гæсгæ, ректоры хъуамæ равзарой коллектив, профессортæ, доценттæ, уагдоны кусджытæ, кæцытæ бæлвырд кæнынц хæххон-металлургон институты цæсгом. Уыдон хъуамæ саразой равзæрст уавæрмæ, институты райрæзты прогнозтæм гæсгæ", — бахатт кодта РЦИ-Аланийы хицауады сæрдар.

Ныртæккæ институтӕн нæй къухдариуæггæнæг. Раздæр ахуыргæндты совет рахаста æнæууæнчы вотум раздæры ректор Юрий Разореновæн. Уый æххæст кæндзæн институты къухдариуæггæнæджы хæстæ, цалынмæ коллектив ног ректор нæ равзара, уæдмæ.

Ног хабӕртты лентӕ
0