03:19 24 КÆФТЫ МÆЙ
 2017
Комкоммӕ эфир
Цхинвалы дзулфыцӕн комбинат

Цхинвалы дзулфыцӕн комбинат ӕрбынат кӕндзӕн ног бӕстыхайы

© Sputnik / Ада Багиан
Хуссар Ирыстоны
Чысыл дӕнцӕг
36 0 0

Хуссар Иры ӕнӕивгӕ символтӕм хауы цхинвайлаг дзул. Уый уӕлдай хӕрзаддзинад нысан кӕнынц куыд бынӕттон, афтӕ ӕрцӕуӕггаг адӕм дӕр. Республикӕйӕ дард цӕрынмӕ чи ацыд, уыдон, сӕ ныхӕстӕм гӕсгӕ, уӕлдай арӕх фӕмысынц Цхинвалы дзул. Комбинаты директор ныфс дӕтты, ног агъуыст ӕмӕ ифтонггарзы фӕрцы дзул хуыздӕрӕй дарддӕр йӕ гъӕд кӕй нӕ фесафдзӕн.

Цхинвал, 8 сен — Sputnik, Плиты Фатимӕ. Цхинвалы ӕрӕвнӕлдтой дзулфыцӕн комбинаты ног бӕстыхайы арӕзтадмӕ. Ног агъуыст арӕзт цӕуы Инвестицион нывӕзты фӕлгӕтты, зӕрондмӕ хӕстӕг. Ныридӕгӕн бӕстыхайӕн ӕвӕрд ӕрцыд ӕрмӕстдӕр йӕ бындур. Проектмӕ гӕсгӕ, ӕрбалӕугӕ азы коллектив хъуамӕ райдайа кусын ног агъуысты бын раззагон ифтонгадыл.

Цхинвалы дзулфыцӕн комбинаты бӕстыхай рагӕй ис ӕдзӕллаг уавӕры. Арӕзт ӕрцыд ӕрдӕг ӕнусӕй фылдӕры размӕ. Нӕ йыл бацауӕрста 2008 азы гуырдзиаг нӕмыг дӕр. Хӕсты фӕстӕ аразджытӕ бакуыстой ӕрмӕстдӕр комбинаты ӕддаг бакастыл. Бӕстыхай ӕмӕ ифтонггарз дӕр сты ивинаг.

Цхинвальский хлебокомбинат
© Sputnik / Ада Багиан
Бӕстыхай ӕмӕ ифтонггарз дӕр сты ивинаг.

 

Комбинаты директор Цхуырбаты Вадим куыд радзырдта Sputnik, афтӕмӕй аразджытӕ кӕнынц гъӕдджын куыст, фӕлӕ цадӕггай.

"Аразджытӕ нын бахынцыдтой нӕ фиппаинӕгтӕ иууылдӕр, ӕрӕмных кодтой проект нӕ домӕнтӕм. Ног бӕстыхай ӕд ифтонгад ӕппӕт гуырахстӕй хъуамӕ скуса 2016 азы — ахӕм ныфс дӕттынц аразджытӕ. Фӕлӕ ам кусджытӕ нӕ зынынц цалдӕр къуырийы дӕргъы. Хуссар Ирыстоны фарс рӕстӕгыл рахицӕн кодта ӕхцайы фӕрӕзтӕ объектӕн, уымӕ гӕсгӕ арӕзтад кӕй фӕстиат, кӕны уый баст у ӕндӕр ӕбӕрӕг аххосӕгтимӕ", — радзырдта дзулфыцӕн амалиуӕгады хистӕр.

Ног бӕстыхайӕ дарддӕр ма дзулфыцӕн комбинат ифтонг ӕрцӕудзӕн нырыккон, ӕппӕт домӕнтӕн дзуапдӕттӕг ифтонггарзӕй.

"Ног бӕстыхаймӕ сӕрмагонд ифтонггарзы хӕйттӕ ӕмбырд цӕуынц дунейы алы къуымтӕй. Ифтонггарз уыдзӕн, нырмӕ цӕуыл кусӕм, уымӕ ӕнгӕс, фӕлӕ раззагондӕр. Кондитерон кæндтæн сӕ ифтоггарз уыдзӕн Италийы рауагъд, хыссӕзмӕнтӕнӕтӕ Испанийы, ӕмӕ афтӕ дарддӕр", — банысан кодта Цхуырбаты Вадим.

Дунейы базарадон уавӕртӕ ӕндавынц бынӕттон арӕзтӕдтыл дӕр. Дзулфыцӕн комбинаты ног ифтонгад фӕсарӕнты ӕлхӕд кӕй цӕуы, уымӕ гӕсгӕ аразджытӕ хӕрдзтыл нал ӕххӕсынц. РХИ Арӕзтады министрады пресс-службӕйы фехъусын кодтой Sputnik, дзулфыцӕн комбинаты бӕстыхайы арӕзтадӕн уӕлӕмхас финасон фӕрӕзтӕ рахицӕн кӕныны фарст скуыддзаг кӕй цӕудзӕн ӕввах Ӕхсӕнхицауадон къамисы рабадты.

"Ныры базарадон уавӕрты рахицӕнгонд финансон фӕрӕзтӕ нал ӕххӕсынц хӕрдзтыл. Аразджытӕ ӕнхъӕлмӕ кӕсынц Хуссар Ирыстон ӕмӕ Уӕрӕсейы ӕхсӕн Ӕхсӕнхицауадон къамисы рабадтмӕ, кӕцы уагъд ӕрцӕудзӕн сентябры. Ам аскуыддзаг кӕндзысты арӕзтадӕн уӕлӕмхас финасон фӕрӕзтӕ рахицӕн кӕныны фарст. Нывӕзтмӕ гӕсгӕ куыстыты егъау хай ӕххӕст цӕудзӕн 2016 азы", — загъта министрады пресс-секретарь Тедеты Алена.

Йӕ ныхӕстӕм гӕсгӕ, дзулфыцӕн уагдоны нырма хъуамӕ фидар ӕрцӕуа ифтонггарз, уый фӕстӕ та адарддӕр уыдзӕн йӕ арӕзтад.

Цхинвалы комбинаты дзул у уӕлдай хӕрзад. Хуссар Ирӕй дард цӕрынмӕ чи ацыд, уыдон, сӕ ныхӕстӕм гӕсгӕ, уӕлдай арӕх фӕмысынц Цхивалы дзул.

Комбинаты директор ныфс дӕтты, ног агъуыст ӕмӕ ифтонггарзы фӕрцы дзул хуыздӕрӕй дарддӕр йӕ гъӕд кӕй нӕ фесафдзӕн.

Цхинвальский хлебокомбинат
© Sputnik / Ада Багиан
Комбинаты директор ныфс дӕтты, ног агъуыст ӕмӕ ифтонггарзы фӕрцы дзул хуыздӕрӕй дарддӕр йӕ гъӕд кӕй нӕ фесафдзӕн.

 

Ног бӕстыхай ӕппӕт гуырахстӕй куы скуса, уӕд уагдоны къухдариуӕгад фӕнд кӕны зӕронд агъуыст рацаразын, цӕмӕй дзы фидӕны срӕвдз кӕной ног рауагъдад.

"Фӕнды нӕ бынӕттон дыргъ, халсар ӕмӕ урсагӕй уадзын продукци. Туаг, мураба, урсаджы продукци фӕсарӕнтӕй ласыны бӕсты бынаты цӕмӕннӕ хъуамӕ уадзӕм? Мӕ хъуыдытӕ бавдыстон хицауадмӕ дӕр ӕмӕ мын нӕйы зӕгъӕг нӕй", — радзырдта директор.

Ныр цалдӕр азы дӕргъы комбинат йӕ продукци хӕццӕ кӕны Республикӕйы алы къуымтӕм дӕр, уый фӕрцы хъӕуы цӕрджытӕн дӕр фӕрог сты сӕ царды уавӕртӕ.

"Къуыри дыууӕ хатты нӕ хъӕумӕ ласынц кӕрдзын. Алы хъӕуы цӕрджытӕ дӕр иу ранмӕ ӕрбамбырд вӕййынц ӕмӕ уым сӕмбӕлынц дзулласӕн машинӕйыл. Райсӕм 5-7 кӕрдзыны ӕмӕ иу бинонтӕн цалдӕр боны фаг вӕййынц. Хорз у ацы хъуыддаг хъӕуты, фӕлӕ йын ӕппӕрццаг фарс дӕр ис. Раздӕр-иу алы хӕдзары дӕр ӕфсин кодта кӕрдзын, бацӕттӕ-иу кодта ӕртӕ уӕлибӕх дӕр. Ныр уӕлибӕхтӕ скӕныц ӕрмӕстдӕр Дзуары бонты ӕмӕ ӕндӕр бӕрӕгбӕтты", — дзуры Знауыры районы цӕрӕг Джиоты Георгий.

Цхинвалы дзулфыцӕн комбинат кӕрдзыны цалдӕр хуызӕй дарддӕр уадзы адджинӕгты продукцийы уӕрӕх ассортимент. Амалиуӕгады кусы 200 адӕймагӕй фылдӕр.

Цхинвальский хлебокомбинат
© Sputnik / Ада Багиан
Комбинат кӕрдзыны цалдӕр хуызӕй дарддӕр уадзы адджинӕгты продукцийы уӕрӕх ассортимент.

Цхинвалы дзулфыцӕн комбинаты продукцийы хӕрзгъӕддзинад у коллективы хæрзиуæг. Кусджытӕ сӕ куыстыл сӕ къух нӕ систой 2008 азы хӕсты тӕмӕны дӕр. Знаг Цхинвалы уынгты фыдмитӕ куы кодта, уӕд комбинаты кусджытӕ фыхтой кӕрдзын, ныккӕндты фыдӕзнагӕй цы адӕм ӕмбӕхст ӕмӕ хӕсты быдыры сӕ Райгуырӕн бӕстӕйы сӕрвӕлтау чи тох кодта, уыдонӕн. Нӕмыджы ӕхст-иу куы фӕсабыр, уӕд та сӕ ластой горӕты районтӕм. Кӕрдзын ласгӕ-ласын комбинаты кусджытӕй дыууӕ фӕмард сты знаджы нӕмыгӕй.

Ног бӕстыхаймӕ коллектив ӕнхъӕлмӕ кӕсы бӕрӕгбонау — уӕд бирӕбӕрцӕй фӕхуыздӕр уыдзысты сӕ куысты уавӕртӕ.

Сӕйраг темӕтӕ

Цхинвалы дзулфыцӕн комбинат

Сӕйраг темӕтӕ