Фæсивæд мысы "Хубул" "Парпат", "Колорадо", Гæззаты Вадимы æмæ æндæрты

© Sputnik / Ада БагианФæсивæд мысы "Хубул" "Парпат", "Колорадо", Гæззаты Вадимы æмæ æндæрты
Фæсивæд мысы Хубул Парпат, Колорадо, Гæззаты Вадимы æмæ æндæрты - Sputnik Хуссар Ирыстон
Рафыссын
Фæстаг азты мидæг фыццаг хатт телеэкранæй хъуысынц ахæм быдырон командирты нæмттæ, куыд "Парпат", "Хубул", "Гæмæт", Козаты Андрей, "Пъарчъи", "Колорадо" бирæ æндæр нӕмттӕ. 1990-æм æзты райдианы, националон-ирвæзынгæнæн змæлды тæмæны, Хуссар Ирыстоны ацы нæмттæ уыдысты легендарон.

ЦХИНВАЛ, 15 сен — Sputnik, Хъотайты Мария. Хуссарирыстойнаг телеуынынады экрантæй ногæй хъуысынц националон хъайтарты нæмттæ. Ног историйы цаутæ ссисты ПТРК "Ир"-ы телепроект "Хъайтар"-ы темæ, фехъусын кодта Sputnik проекты режиссер Мамиты Григорий.

Фæстаг азты мидæг фыццаг хатт телеэкранæй хъуысынц ахæм быдырон командирты нæмттæ, куыд "Парпат" (Джиоты Алан) — йæ ном лæвæрд æрцыд столицæйы центры проспектæн, "Хубул" (Хуыбылты Валерий) — Хуссар Ирыстоны фыццаг хъахъхъæнынады министр, "Гæмæт" (Туаты Гæмæт), Козаты Андрей, "Пъарчъи" (Санахъоты Алан), "Колорадо" (Джиоты Алик) æмæ бирæ æндæр нӕмттӕ. 1990-æм æзты райдианы, националон-ирвæзынгæнæн змæлды тæмæны, Хуссар Ирыстоны ацы нæмттæ уыдысты легендарон. Бирæтæ дзы хайад истой Абхазы Фыдыбæстæйон хæсты æмæ ирон-мæхъæлон конфликты дӕр.

Комкоммæ эфиры проекты æртæ туры рафæлгъаудзысты, республикæйы ног истори кæцы хайадисæг зоны хуыздæр, уый. Проекты хайадисджытæ сты 9, 10 и 11 къласты ахуыргæнинæгтæ, уыдон хъуамæ иттæг хорз зоной 1989-1992 ӕзты æрцæугæ цаутæ æмæ дзуапп радтой амонæджы фарстытæн.

Уӕды рӕстӕджы Хуссар Ирыстоны адæмы ирвæзынгæнæн тох националистон Гуырдзыстонимæ рабӕрӕг кодта хъайтарты, быдырон командирты, кæцытæ иунæджытæй æвдыстой диссаджы æхсардзинад.

"Адæмæн ацы нæмттæ хорз зонгæ сты, фæлæ бирæ хатт уыдон нæ зонынц, конкретонæй цы хъæбатырдзинæдтæ сарæзтой бархионтæ, кæд æмæ цы уавæрты сырæзт хъахъхъæнынады министрад, кæд æрбацыдысты гуырдзиаг хотыхджын къордтæ сабыр Цхинвалмæ. Уæдæй нырмæ рацыд 20 азы æмæ рæзгæ фæлтæр нал зонынц сæ хъайтарты. Ацы проект здæхт у нæ историйы пропагандæмæ", — загъта Мамиты Григорий.

© Sputnik / Сергей Титов /  Ахизын медиабанкмæХъайтартæ, быдырон командиртæ, кæцытæ иунæджытæй æвдыстой диссаджы æхсардзинад.
Осетинский отряд самообороны - Sputnik Хуссар Ирыстон
Хъайтартæ, быдырон командиртæ, кæцытæ иунæджытæй æвдыстой диссаджы æхсардзинад.

Иу турæй иннæмæ къаддæр кæны хайадисджыты нымæц. Карз къамисы сконды ис æртæ уæнджы: республикæйы парламенты фыццаг æрсидты депутат, филолог Битарты Зоя, æфсæддон архæйдтыты активон хайадисæг, Милицийы сæрмагонд нысаниуæджы къорды раздæры сæргълæууæг Пухаты Мераб æмæ йæ æмтохгæнæг Тедеты Улифан.

Проекты амонæг Бибылты Сослан алкæцы хайадисæгæн дæр ратты фадат фарстимæ билет сисын. Жюри йæ хъус здахы, куыд дзуапп кæны хайадисæг, йæ дикцимæ, йæхи куыд дары студийы æмæ афтæ дарддæр.

Проекты идейæйы автор у ПТРК "Ир"-ы кусæг Бестауты Юля.

"Юля у идейæйы æмæ йæ сæйраг аспектты автор, æз та архайын режиссурæйы. Мæ коллегæйы хъуыдымæ гæсгæ, ацы проект хъуамæ уа цыбыр, цæмæй телекæсæг ма бафæлмæца. Уый æмрæстæджы дзы хъуамæ уа максималон информаци, сæрибардзинадмæ нæ цы хъайтартæ æмæ цаутæ æркодтой, уыдон тыххæй", — загъта Мамиты Григорий.

Цхинвалы цæрæг, 29-аздзыд Джиоты Ирӕ скъуыддзæгтæй хъуыды кæны 90-æм æзты райдианы гуырдзиаг-ирон конфликт.

"Уæд мыл цыд æхсæз азмæ æввахс. Цхинвалы нæ уыд газ, рухс, хъазæнтæ. Хорз хъуыды кæнын, мæ хо æмæ мæ мадимæ куыд фæцæйцыдыстæм, ногазон лæвæрттæ цы бынаты дæттой, уырдæм. Уыцы æгъуыз боны, æнкъард цæсгæмтты æхсæн ирдæй бахъуыды кодтон ногазон лæвæртты рæсугъд къоппытæ. Мæ мад нын загъта, ацы лæвæрттæ сывæллæттæн кæй æрласта "Парпат". Æз уæд нæ зыдтон, уый чи у, фæлæ дзы уыдтæн æгæрон бузныг. Ацы лæвар баззад ирд тæппæй мæ æфсæддон сабибонты мысинæгты", — дзуры Ирæ.

Хуссар Ирыстоны нырма нæ рауагътой ахуыргæнæн чиныг ног историйæ, цыран хронологон фæткыл æвæрд уаиккой 90-æм æзты цаутæ æмæ истори чи арæзта, уыцы хъайтарты нæмттæ.

Проекты организаторты ныхæстæм гæсгæ, "Хъайтар"-ы уæлахиздзау хорзæхджын æрцæудзæн 25 мин сомæй. Проект арæзт æрцыд Республикæйы бонмæ, кæцы Хуссар Ирыстоны нысан цæуы 20 сентябры.

Ног хабӕртты лентӕ
0