Тыбылты Леонид: Хуссар Ирыстон уыны æргом перспективæ ЕАЭЦ-мæ бацæуынæн

© Sputnik / Роин БибиловРХИ президент Тыбылты Леонид
РХИ президент Тыбылты Леонид - Sputnik Хуссар Ирыстон
Рафыссын
Хуссар Ирыстон лæмбынæг хъусдард здахы евразиаг тыгъдадыл цæуæг интеграцион процесстæм æмæ разы у семæ, фехъусын кодта Тыбылты Леонид.

ЦХИНВАЛ, 28 окт — Sputnik. Хуссар Ирыстон йæхи нымайы евразиаг тыгъдады æнæбайсгæ хайыл æмæ Евразиаг экономикон цæдисмæ бацæуыны уыны æргом перспективæ, фехъусын кодта æртыццæджы президент Тыбылты Леонид.

Цхинвалы уагъд цæуы æхсæнадæмон зонадон-практикон конференци. Йæ хайадисджытæ уынаффæ кæнынц УФ æмæ РХИ-ы æхсæн æмцæдисон ахастыты райрæзтыл евразиаг интеграцийы контексты.

"Хуссар Ирыстон лæмбынæг хъусдард здахы евразиаг тыгъдадыл интеграцион процесстæм æмæ семæ разы у. ЕАЭЦ сырæзты Уæрæсейæн ис ахсджиаг нысаниуæг. Евразиаг интеграци у фӕссоветон тыгъдады паддзахæдты интерестæн дзуапдæттæг процесс", — загъта Тыбылты Леонид.

Уыимæ иумæ президент банысан кодта, кæй ис бæстæтæ, кæцытæ тырнынц Евроцæдисимæ фенгомдæр кæнынмæ, фæлæ уыцы къахдзæфтæ хæссынц æрмæст политикон нысаниуæг.

Уый загъта, Хуссар Ирыстоны хайадисты тыххæй ЕАЭЦ дзырд кæй цыд уæрæсейаг коллегæтимæ æмæ кавказаг республикæйæн "ахæм перспективæ кæй хæссы æвæрццаг нысаниуæг".

"Мах хъæуы хынцын, ацы фарсты нæм кæй æнхъæлмæ кæсынц объективон цæлхдуртæ. Фæлæ уымæ æнæкæсгæйæ, республикæ арызы къахдзæфтæ, цæмæй æнгом балæууа евразиаг организацимæ", — банысан кодта республикæйы сæргълæууæг.

Иу ахæм къахдзæфыл Тыбылты Леонид нымайы 2012 азы УФ æмæ РХИ-йы æхсæн базарады режимы тыххæй цы бадзырд бафыст æрцыд, уый. Ацы бадзырды реализацийы хъуыддаджы Хуссар Ирыстон архайы уæрæсейаг таможнæйон закъондæттынад æмæ таможнæйон цæдисы уагæвæрды домæнтæм гæсгæ.

Уымæй дарддæр ма президент загъта, республикæ Уæрæсеимæ кæй æнгомдæр кæны, уыцы къахдзæфтæ нысан кæнынц Евразиаг экономикон цæдисы институттæ æмæ хайадисджытимæ æнгом кæнын дæр.

"Ацы процесстæ тынг ахсджиаг сты Хуссар Ирыстонæн. Уæлдайдæр та ныр, Кавказы куы сæвзæрд тæссаг уавæр, кризис, дунейон барады бындуртæ куы фæцудыдтой, терроризм та динон фундаментализмы лозунгы бын райста тæссагдзинад хæссæг формæ", — загъта Тыбылты Леонид.

Конференцийы рæстæджы раныхас кæндзысты Хуссар Ирыстоны Паддзахадон университеты æмæ Стратегион раиртæстыты уæрæсейаг институты эксперттæ æмæ политологтæ.

Ног хабӕртты лентӕ
0