ЦХИНВАЛ, 23 дек — Sputnik. Хуссар Ирыстоны театруарзджытӕн ног азы къӕсӕрыл паддзахадон драмон театры труппӕ равдисдзӕн музыкалон комеди "Ды мӕ куы уарзай", фехъусын кодта Sputnik театры аивадон къухдариуӕггӕнӕг Къацты Филипп.
Спектакль ӕвӕрд цӕуы Хуыгаты Геор ӕмӕ Хуыбецты Раяйы уацмыс "Софьяйы зарӕг"-мӕ гӕсгӕ. Ацы спектакль 30 азы размӕ ӕнтыстджынӕй ӕвӕрд ӕрцыд Хуссар Ирыстоны паддзахадон театры сценӕйыл. Уӕд ӕй сӕвӕрдтой театралон ахуыргӕнӕндоны рауагъдонтӕ, се ‘хсӕн уыд йӕ ныры режиссер, Цӕгат Ирыстоны сгуыхт артисткӕ Хъӕцмӕзты Фатимӕ.
"Фӕстаг рӕстӕджы фылдӕр ӕвӕрдтам трагедите. Ныр музыкалон спектакль барухс кӕндзӕн театруарзджыты зӕрдӕтӕ ӕмӕ рауӕрӕх кӕндзӕн театры репертуар хъӕлдзӕг пьесӕтӕй", — загъта Къацты Филипп.
Комедийы ӕвӕрӕг-режиссер Хъӕцмӕзты Фатимӕйы ныхӕстӕм гӕсгӕ, пьесӕмӕ хаст ӕрцыд ивындзинӕдтӕ — айстой дзы колхозтӕ ӕмӕ совхозты кой ӕмӕ йӕ баххӕст кодтой нырыккон зарджытӕй.
"Бахастам ӕм Харебаты Тимур ӕмӕ Вадимы зарджытӕ. Афтӕ ма фыццаг хатт театры сценӕйыл актеры дӕсниады йӕхи бафӕлвардзӕн зарӕггӕнӕг Хаситы Сослан", — радзырдта Хъӕцмӕзты Фатимæ.
Спектаклы премьерӕ уагъд ӕрцӕудзӕн 29 декабры. Дыууӕ боны размӕ уал пьесӕ равдисдзысты специалистты къордӕн.
Хуссар Ирыстоны паддзахадон драмон театры бӕстыхайы арӕзтад фӕуыдзӕн 2016 азы фыццаг ӕмбисы.
