ЦХИНВАЛ, 19 янв — Sputnik. Зындгонд телеамонӕг, телекӕсджыты уарзондӕр алӕвӕрд "Путешествие по родному краю"-йы автор Габайты Владимир дыццӕджы нысан кӕны йӕ 75 азы юбилей.
Владимир Никъалайы фырт æрвылкъуыри дӕр стыр цымыдис æмæ монцимæ телевизорты экранæй дзуры æрвылбонон фæзындтыл, нӕ республикӕйы рӕсугъд флорӕ ӕмӕ хъӕздыг фаунӕйы тыххӕй.
"Телеуынынады сеткæ бынтон ӕнӕххӕст уаид ӕнӕ æрвылкъуырион алæвæрд "Путешествие по родному краю"-йӕ. Телекæсæгмæ фæкæсы, цыма йæ цавæрдæр æбæрæг тых нал фæуадзы экранæй разæй фезмæлын. Фыццаг бакастæй зæгъæн ис æмæ тележурналистикæ у æрыгæттæ æмæ хъаруджынтæн, фæлæ "дядя Вова" телеуынынады къæсæрæй бахызт 70-аздзыдæй æмæ дзы бынтон æнцонæй бацахста йæхи бынат", — радзырдта Sputnik телеуынынады кусӕг Гаглойты Карина.
Алæвæрды æнтыстытæ бирæбæрцæй баст сты уыимæ, æмæ 75-аздзыд биолог-географ нæ тæрсы зын фæндæгтыл цæуын, цæмæй фото- æмæ телекамерæйыл ныттæлмæн кæна радон алæвæрды цымыдисон сюжет. Ахæм балцытæн хъæуы егъау тыхтæ æмæ фæразондзинад, уымæн æмæ фистæгæй бирæ бахъæуы цæуын, ӕмӕ Владимир Никъалайы фырт, йӕ кармӕ ӕнӕкӕсгӕйӕ, йӕ куыст ӕнувыдӕй уарзгӕйӕ, Ирыстоны къуымтӕй куы кӕм балӕууы, куы та кӕм.
Габайты Владимир телеуынынады кусын райдыдта 2011 азы ӕмӕ цыбыр рӕстӕгмӕ балхӕдта телекӕсджыты зӕрдӕтӕ, ссардта йӕхи уӕрӕх аудитори.
