ЦХИНВАЛ, 20 июн — Sputnik, Хъотайты Мария. Компани "Евродон" бавнæлдта фыдызгъæлкуыстгæнæн завод аразынмæ Хуссар Ирыстоны. Проекты реализаци компанийы сæргълæууæг, зындгонд уæрæсейаг амалиуæггæнæг Уанеты Вадимæн слæудзæн 156 милуан сомы.
Амалиуæггæнæджы ныхæстæм гæсгæ, уыдон сты кредитон фæрæзтæ, кæцытæ Мæскуыйы банк сфидар кæндзæн æрмæстдæр проекты арæзтады экспертизæйы фæстæ.
Кæд бизнесмен нырма æхцайы фæрæзтæ нæ райста, уæддæр уый райдыдта арæзтад. Æмæ æмбæлон финансон фæрæзты фæрцы арæзт æрцæудзæн æрдæг азмæ, банысан кодта Уанеты Вадим.
"Сæйраг нысаниуæг арæзтады нæй, фæлæ куысты механизмы райдианы. Заводы уагъд цæудзæн дæс хуызы къалбасы продукци. Куысты бынæттæй ифтонг æрцæудзысты 30 адæймаджы, кæцытæ иу сменæмæ араздзысты дыууæ тоннæйæ фылдæр продукци",- загъта Уанейы фырт брифингы рæстæджы Цхинвалы.
Суинаг заводы персоналы иу хай ныридæгæн цæуы практикæУанеты Вадимы куыстуæттæй иуы, Уæрæсейы.
"Куыстмызд уыдзæн уæрæсейаг мыздты æмвæзадыл. Иунæг карз домæн уыдзæн куысты контроль, уымæн æмæ цæмæй æввахс æхсæз азмæ кредит бафидынхъом уон, уый тыххæй мæ хъæуы æмбæлон куысты процесс",- банысан кодта амалиуæггæнæг.
Уанейы фырты прогнозтæм гæсгæ, аразгæ продукци иууылдæр уыдзæн хæрзхъæд æмæ æххæстæй ифтонг кæндзæн республикæйы мидæггагон базарад.
Ныртæккæ æнтыстджын уæрæсейаг бизнесмены дæлбар ис 12 куыстуаты, цы ран фæллой кæнынц авд мин кусæджы.
"Евродон" у егъау маргъдарæн агрокомплекс, кæцы азы мидæг уадзы 47 тоннæйы гогызы фыд æмæ 24 тоннæйы бабызы фыд.
