ЦХИНВАЛ, 18 авг — Sputnik, Плиты Фатимӕ. Хуссар Ирыстоны скъолатӕ ӕййафынц хъуагдзинад мадӕлон ӕвзаг ӕмӕ литературӕйы чингуытӕй. Ӕрвылаз дӕр ныййарджытӕ ӕмбӕлынц ирон ӕвзагӕй ахуыргӕнӕн чингуытӕ ссарыны проблемӕйыл. Sputnik уацхӕссӕг бацымыдис кодта, Ирыстоны ирон ӕвзаг ӕмӕ литературӕйы чингуытӕ стӕм цӕмӕн хъуамӕ уой ӕмӕ цы аразы ахуырады министрад ацы проблемӕ аскъуыддзаг кӕныны тыххӕй.
Гаглойты Каринайӕн йӕ фырт ахиздзӕн ныр 7-ӕм къласмӕ рӕстдинон гимназы. Йӕ ныхӕстӕм гӕсгӕ, алы ахуыры азы райдайӕны дӕр сын стыр проблемӕ вӕййы ирон ӕвзаджы ахуыргӕнӕн чиныг ссарын.
"Кӕд иннӕ чингуытӕн, зынаргъӕй, фӕлӕ ссарӕн вӕййы, уӕд ирон чингуытӕ та туджиаргъӕй дӕр никуы ссардзӕ. Нӕдӕр нын скъолайы раттынц, нӕдӕр дуканиты вӕййы, хистӕр кълӕсты ахуырдзауты чингуытӕм гӕппӕй лӕууӕм ӕмӕ дӕм кӕд искӕй бызгъуыр чиныг рхауа, уӕд хорз", — радзырдта Sputnik Карина.
Ахуырады министрады ацы проблемӕйы аххосаг рахуыдтой скъолӕты библиотекӕты лӕмӕгъ куыст.
"Хъусдард аздахын хъæуы скъолаты библиотекæты куыстмæ, уымӕн ӕмӕ ӕрвылаз дӕр ирон æвзаг æмæ литературæйы чингуытæй министрад сифтонг кæны ахуырадон уагдæтты уӕлдайджынтӕй, фæлæ та ног ахуыры аз скъоладзаутыл нал аххæссынц. Ныр дæр та кæцыдæр скъолатæ æвзарынц ацы чингуыты хъуагдзинад. Уый у библиотекӕты лӕмӕгъ куысты фӕстиуӕг", — фехъусын кодта министрады националон ахуырады хайады хистæр Козаты Инга.
Йӕ ныхӕстӕм гӕсгӕ, ахуырады министрад та ацы аз дӕр баххæст кæндзæн скъолаты ирон æвзаг æмæ литературæйы чингуыты хъуагдзинад.
"Уæлæмхасæй Дзæуджыхъæуы балхæндзыстæм 10-ӕм кълӕстæн чингуытæ. Скъолатæй нæм бахатыдысты, æртыккæгæм къласы кæсыны чингуытæй кæй тыхсынц, уымӕ гӕсгӕ хъуамæ балхæнæм ацы чингуытæй 400-йы бæрц. Уымæй дарддæр ма аннæ кълӕсты дæр кæцыдæр ахуыргæнæн чингуытæ баххæст кæндзыстæм 200-300 экземпляртæй", — радзырдта Козаты Инга.
Ирон литературæ æмæ æвзаджы чингуытæ æлхæд цæуынц ирон æвзаджы райрæзты паддзахадон программæйы фæлгæтты.
