ЦХИНВАЛ, 30 авг — Sputnik. Хуссар Ирыстоны ӕмбӕстӕгты фӕлхасгӕнӕн культурӕ уӕлдӕр кӕны бонӕй бонмӕ, уыдон арӕхдӕр райдыдтой хатын Югосетпотребнадзомӕ сӕ бартӕ бахъахъхъӕныны нысанӕн, загъта пресс-конференцийы рӕстӕджы сӕйраг санитарон дохтыр Коцты Маринӕ.
Йӕ ныхӕстӕм гӕсгӕ, фӕлхасгӕнджыты куырдиӕттӕ ӕмӕ хъӕстытӕ сты ахадгӕ бындур, алыгъуызон лӕггӕдтӕ кӕм кӕнынц, уыцы объектты басгӕрстӕн.
"Законмӕ гӕсгӕ махӕн ис базарадон объекттӕ, салонтӕ, ӕхсӕнадлон хӕрӕн бынӕттӕ ӕмӕ ӕндӕртӕ сгарын ӕрмӕстдӕр азы мидӕг иу хатт. Фӕлӕ ӕдзӕсгом амалиуӕггӕнджытӕн нӕ басгӕрстыты фӕстӕ сӕ бон у цыфӕнды дӕр аразын. Уымӕ гӕсгӕ, ахсджиаг у, цӕмӕй фӕлхасгӕнджытӕ зоной сӕ бартӕ ӕмӕ нӕм ӕрбахатой сӕ фехалыны рӕстӕджы", — загъта Коцты Маринӕ.
Уый ма банысан кодта, фӕстаг рӕстӕджы амалиуӕггӕнджытӕн кӕй фӕзынд бӕрнондӕр ахаст сӕ бартӕм — бахъуыды рӕстӕджы ӕрдомынц ӕргътӕ, хъӕстыты чиныг, уӕлдайдӕр та санитарон нормӕты фӕдыл.
Фыццаг рады уыдӕттӕ хауынц цӕттӕ къӕбицты ӕмӕ ӕндӕр базарадон объекттӕм, уый та фӕзыны инфекцион низты парахат ма ӕруадзыныл.
Домӕнтӕ ӕххӕст куы нӕ ӕрцӕуой, уӕд Югосетпотребнадзорӕн ис бар ӕрмӕст ивар кӕнын нӕ, фӕлӕ ма объект бынтондӕр сӕхгӕнын — ахӕм хъуыддаг дӕр уыд. Бирӕнымӕц адӕм куы фӕхъӕстӕ сты, уӕд уагдон сӕхгӕдта иу цӕттӕ къӕбицы объект. Ӕнӕмӕнгхъӕуӕг домӕнтӕ сӕххӕст кӕныны фӕстӕ, амалиуӕггӕнӕгӕн ногӕй лӕвӕрд ӕрцыд бар йӕ архайд адарддӕр кӕнын.
"Хъуыддаг уыййӕнгты стӕм хатт ацӕуы, амалиуӕггӕнджыты арӕхдӕр кӕнӕм ивар. Фӕткхалыны цаумӕ гӕсгӕ бӕлвырд цӕуы ивары бӕрц дӕр. Зӕгъӕм, йе ‘мгъуыд цы продукцийӕн ацыд, уый уӕй кӕныны рӕстӕджы физикон гоймӕгтӕн ивары бӕрц у 10-20 мин сомы, юридикон гоймӕгты та 20 мин сомӕй уӕлдӕр", — загъта сӕйраг санитарон дохтыр.
Уый ма быфтыдта, чысыл фӕткхӕлдты рӕстӕджыты Югосетпотребнадзор кӕй ратты рекомендацитӕ ӕмӕ ӕнӕмӕнгӕй басгары, ӕххӕст ӕрцыдысты ӕви нӕ.
