ЦХИНВАЛ, 13 янв — Sputnik. Хуссар Ирыстон ӕмӕ Гуырдзыстоны арӕныл, Ленингоры районы уадзӕн пункт "Раздӕхӕн"-ы бынаты ис гӕнӕн ӕмӕ байгом ӕрцӕуа таможнӕйон уадзӕн пункт, загъта журналисттӕн Хуссар Ирыстоны Таможнӕйон комитеты сӕргълӕууӕг Цхуырбаты Мурӕт.
Фарон августы вице-премьер Козаты Дмитрийы хӕслӕвӕрдмӕ гӕсгӕ уагъд ӕрцыд къуырион мониторинг. Хуссарирыстойнаг арӕнхъахъхъӕнджытӕ ӕмӕ таможнӕйы кусджытӕ, афтӕ ма Паддзахадон ӕдасдзинады комитеты минӕвӕрттӕ къуырийы дӕргъы сӕ хъус дардтой уадзӕн пункты куыстмӕ.
"Ныртӕккӕ "Раздӕхӕн" ис ӕрмӕстдӕр уӕрӕсейаг арӕнхъахъхъӕнджыты контролы бын. Фарон августы мах нӕ коллегӕтимӕ иумӕ сгӕрстам, куыд кусы уадзӕн пункт. Нысан кодтам, цас базайраг ласт цӕуы, чи дзы хизы, уыдон, зонӕнтӕ иууылдӕр цыдысты хаст цыдысты протоколмӕ. Фӕстӕдӕр мах банымадтам ӕмӕ цифрӕтӕ иууылдӕр бавдыстам хицауадмӕ", — загъта Цхуырбаты Мурӕт.
Йӕ ныхӕстӕм гӕсгӕ, хицауадӕй ныридӕгӕн ӕрбацыд ӕнхъарӕн "Раздӕхӕны" таможнӕйон пост сӕвӕрыны тыххӕй, фӕлӕ ацы здӕхты нырма ницы конкретон архӕйдтытыл цӕуы дзырд.
"Ныртӕккӕ базайраг иууылдӕр цӕуы куыд хисӕрмагонд — иу адӕймагӕн нӕй бар 50 килограммӕй фылдӕр ӕрбаласын. Фӕстӕдӕр ацы базайраг баззайы республикӕйы мидӕг ӕмӕ цӕуы реализаци бынӕттон базары", — загъта Цхуырбаты Мурӕт.
Таможнӕйон комитеты сӕргълӕууӕг банысан кодта, пост бакӕныны фӕстӕ таможнӕйы кусджытӕ сӕ хъус кӕй дардзысты, цӕмӕй сыхаг территорийӕ базайраг ма цӕуа ласт ӕнӕ фиддонтӕй, хъахъхъӕд цӕуой фитосанитарон домӕнтӕ.
Уый ма бафтыдта, фидӕны нӕ республикӕйы территорийыл кӕй ис гӕнӕн ӕмӕ ӕрбайгом уа таможнӕйон контролы пост Фӕскавказ, Ӕввахс Скӕсӕн ӕмӕ Азийы бӕстӕтӕм транзитон транспортӕн.
"Уымӕй дарддӕр ма пост сифтонг кӕндзӕн ӕхцайы фӕрӕзтӕй Хуссар Ирыстоны бюджет", — загъта комитеты сӕргълӕууӕг.
"Раздахæн" йæ куыст райдыдта 2010 азы, дыууæ азмæ уадзæн пункт æххæстæй æрцыд хæрзарæзт. Йӕ уылты æрвылбон хизынц 700 адæймаджы, сӕ фылдӕр кӕнынц коммерцион архайд — ласынц дыргътӕ ӕмӕ халсӕрттӕ Гуырдзыстонӕй, кӕцытӕ уӕй кӕнынц республикӕйы базарадон объекттӕн.
"Раздахæн"-ы таможнæйон контролы пункт нæй, арæнхъахъхъæнджытæн та нæй уыцы функцитæ, уымӕ гӕсгӕ уыдон сӕ хъус нӕ дарынц, цал хатты рахызт уадзӕн пунктыл иу кӕнӕ иннӕ адӕймаг ӕмӕ цас бӕрц продукци раласта (иу адӕймагӕн 50 кг). Уымӕ гӕсгӕ хъахъхъӕд нӕ цӕуы уадзӕн пункты уагӕвӕрд.
