ЦХИНВАЛ, 22 фев — Sputnik, Годжысаты Анна. Цхинвайлаг алкомаркеттӕй иуы ӕрӕсгӕй фӕстӕмӕ уӕй кӕнынц сӕн, кӕцыйы авгыл цӕст ӕбарвӕндӕй ӕрлӕууы. Ууыл ис советон дуджы зындгонд актер Вахтанг Кикабидзейы ныв.
Йӕ аргъ фенгӕйӕ — 1500 сомы — бамбарӕн ис, ацы авг кӕй хауы "элитон нозтмӕ".
2008 азы Кикабидзе не ′сразы Уӕрӕсейы Хӕлардзинады орден райсын ӕмӕ уымӕй равдыста протест, Уӕрӕсе Хуссар Ирыстон ӕмӕ Абхазы фарс кӕй рахӕцыд, уый ныхмӕ, афтӕ ма карзӕй ӕфхӕры Донбассы цӕрджыты тох сӕ сӕрибардзинады сӕрыл ӕмӕ хӕцы Киевы архайгӕ хицауады политикӕйы фарс — ӕппӕт уыдӕттӕ хынцгӕйӕ, мах сфӕнд кодтам базонын дуканийы кусӕгӕй, ацы продуктӕн ӕлхӕнӕг ис ӕви нӕ.
"Стӕм хатт нӕм ӕрбацӕуынц сӕн ӕлхӕнынмӕ, сӕйраджыдӕр агурынц виски, коньяк, арахъхъ. Ӕмӕ ацы маркӕйы авг та у иунӕг тӕрхӕгыл. Ӕдӕппӕтӕй уыдысты ӕртӕ. Аннӕ дыууӕ балхӕдтой ӕрцӕуджытӕ. Ацы авг та никуыд уӕй кӕны", — загъта консультант.
Йӕ ныхӕстӕм гӕсгӕ, нозт Хуссар Ирыстонмӕ ласынц Гуырдзыстонӕй нӕ, фӕлӕ Уӕрӕсейы территорийӕ.
Бацӕуӕны ӕлхӕнӕгыл амбӕлгӕйӕ, ӕз бацымыдис кодтон, цы хъуыды кӕны гуырдзиаг сӕны ӕмӕ йӕ аргъы политикӕйы тыххӕй.
"Алы хӕдзары дӕр аразынц, иттӕг хорз хӕдзарон сӕн ӕмӕ аргъ та бӕрӕг асламдӕр. Мӕ нымадмӕ гӕсгӕ, ацы сӕн йе 'лхӕныны аргъ нӕу. Хуыздӕр у хорз рагон коньяк балхӕнын", — загъта фӕлхасгӕнӕг.
Чысыл анхъӕлмӕ кӕсыны фӕстӕ та бацымыдис кодтам радон фӕлхасгӕнӕгмӕ, кӕцы загъта йӕ хъуыды ацы авджы фӕдыл:"Уарзын Кикабидзейы зӕронд фильмтӕ, фӕлӕ йӕ къам авгыл ӕмӕ актеры националон равзӕрд мӕнмӕ ӕвзӕрын кӕны ӕппӕрццаг ӕнкъарӕнтӕ, нӕ бӕстӕты ӕхсӕн ӕфсӕддон цаутӕ ӕмӕ конфликтты ракурсӕй. Фӕлӕ ӕз сӕн стӕм хӕтт нуазын".
Ноджы ма иу фӕлхасгӕнӕг та загъта, "бынтондӕр не ′мбарын, кӕй хъуыдыйы ӕрцыд Цхинвалмӕ ахӕм бренд ӕрбаласын".
Нӕ мини ӕрфарст бамбарын кодта, зынгӕ артист ӕмӕ сӕндуцӕг — Вахтанг Кикабидзӕйы сӕн нырма бирӕ рӕстӕг кӕй ӕмбырд кӕндзӕн рыг тӕрхӕгыл.
