ЦХИНВАЛ, 22 фев — Sputnik. Фыдыбæстæ хъахъхъæнæджы боны цытæн Цхинвалы бакодтой Хуссар Ирыстоны адæмон нывгæнæг Гæбæраты Борисы куыстыты равдыст.
Гæбæраты Борис архайы графикæ æмæ хуызфыссынады, ацы аз йын у юбилейон — нывгæнæг бацыд 65 азы кары. Уыд ын бирæнымæц равдыстытæ, йæ куыстытæн фенæн вæййы Ирон культурæйы бонты фæлгæтты Европæйы бирӕ горæтты.
ПККЗ "Чермен"-ы равдыстмæ æрбамбырд ис тынг бирæ адæм, юбилярæн раарфæ кæнынмæ æмæ йæ куыстытæ фенынмæ æрбацыдысты республикæйы къухдариуæгад, сфæлдыстадон кусджытæ æмæ аивадæн табугæнджытæ.
Культурæйы министр Остъаты Мӕдинӕ радзырдта, йӕ дӕлбар уагдон Нывгæнджыты цæдисимæ иумæ фæстаг дыууæ азы кӕй бацæттæ кодта 24 равдыстон проекты, уыдоны хайад райста Гæбæраты Борис дæр. Се ‘хсæн ахӕм цымыдисон проекттӕ, куыд равдыст Хъырымы æмæ "Европæйы тæмæн".
"Хорз фæстиуджытæ ис Борисӕн йæ ахуыргæнæджы куысты дæр. Æрæджы Цхинвалы бакодтой Къостайы хъæуы скъоладзауты куыстыты равдыст, кæцыты нывкæнынадыл цайдагъ кæны нӕ юбиляр", — банысан кодта Остъаты Мӕдинӕ.
Нывгæнæг бузныджы ныхæстæ загъта организатортæн æмæ радзырдта, йе ‘сфæлдыстады иу хай кæй у нывонд хæсты темæйæн — йӕ куыстыты фенæн ис 2008 азы августы ирон лæппуты хъæбатырдзинæдтæ дæр.
Гæбæраты Борис каст фæцис Тугъанты Махарбеджы номыл нывгæнæн ахуыргæнæндон, Тбилисы нывгæнæн академи.
Графикæ æмæ хуызфыссынадæй дарддæр ма цæттæ кæны чингуытæм иллюстрацитæ дæр. Йæ куыстæй бирæтæ сты ӕвӕрд музейты.
Нывгæнæджы сфæлыстады фенæн ис Ручъы туннелы æрбаконд, 1989-1992 æзты уæззау рæстæджытæн нывонд куыстытæ, цæдтæ, хæхтæ, дзуæрттæ, хъæууон цард, Ирыстоны пейзажтæ, Цхинвалы Дзуттаг квартал æмæ æндæр нывтæ.
