ЦХИНВАЛ, 14 мар — Sputnik. Экспертон ӕрфарст фæстиуæгæн газет "Республика" рабæрæг кодта, Хуссар Ирыстоны дзыллон информацийы фæрæзты минӕвӕрттӕй ивгъуыд аз хуыздæрыл кӕй банымадтой, уыдон нӕмттӕ.
Газет "Республикæйы" ӕрфарст уагъд цæуы газеты бындурæвæрдæй фæстæмæ — 1995 азæй, йӕ нысан у журналистикӕйы фадыджы канд хуыздæр кусджыты нæмттæ рабæрæг кæнын нæ, фæлæ ма сæ сразæнгард кæнын куыстмæ, ног æнтыстытæм дӕр.
"Ацы азӕй фӕстӕмӕ хъавæм ӕрфарстыты уæлахиздзаутæн саразын хорзæхкæныны цытджын цермони, цæмæй сæ уæлахиз ахадгæдæрӕй зына", —загъта газеты сӕйраг редактор Хъоцыты Андрей.
Фесгуыхӕг уацхӕсджыты бӕрӕг кодтой 7 номинацийы — азы хуыздæр журналист, хуыздæр перспективон журналист, хуыздӕр политикон афӕлгӕсӕг, хуыздæр журналист интервьюйы жанры, спорты æмæ культурæйы фадгуыты, уымæй дарддæр ма ӕрфарст равдисы азы хуыздæр дзыллон информацийы фæрæзы.
2016 азы хæтдзæгтæм гæсгæ хуыздæр дзыллон информацион фæрæзыл нымад æрцыд газет "Республика", дыккаг рæнхъыл ацыд ПТРК "Ир", призерты нымæцмæ ма бахызт ИА "Рес" дӕр.
Æмрæстæджы "хуыздæр политикон афæлгæсæг" æмæ "хуыздæр журналист" номинациты уæлахиздзау ссис газет "Республика"-йы кусæг Л. Джиоты, интервьюйы жанры хуыздæрыл банымадтой Паддзахадон телеуынынады амонæг Дзуццаты Тамерланы. Ӕрфарсты архайджыты хъуыдымæ гæсгæ, спорты хабæрттыл хуыздæр афӕлгӕсӕгыл нымад ӕрцыд газет "Южная Осетия"-йы кусæг Уалыты Гугули.
Газет "Республикæ"-йы минӕвар Хъуылмбегты Роберты ацы аз та фыццаг рæнхъмæ ракодтой культурæйы фадыджы, йæ аннæ æмкусæг, æвзонг журналист Уалыты Дианайы та эксперттæ банымадтой иууыл перспективондæр журналистыл æгас республикæйы.
Афтæ ма æртыккаг æмæ дыккаг бынæттӕ хицæн номинациты адих кодтой куыд фæлтæрд, афтæ æрыгон журналисттыл дæр — Тедеты Роза, Цхуырбаты Мадина, Бестауты Валя, Харебаты Батрадз, Тыджыты Сослан, Гæбæраты Элина, Джергаты Алла, Чехойты Инга, Хуриты Батрадз æмæ æндæртæ.
Экспертон бафарсты хайад райстой мыхуыр æмæ информацийы комитеты сæрдар Тыбылты Алан, парламенты ахуырад, зонад, культурæ, дин æмæ ДИФ фæдыл комитеты хистæр Гæбæраты Юрий, журналистты цæдисы сæрдар Харебаты Батрадз, ХИПУ журналистикæйы кафедрайы къухдариуæггæнæг Хъодалаты Хансиат, газет "Республикæ"-йы редактор Хъоцты Андрей, газет "Южная Осетия"-йы редактор Хъуылымбегты Роберт, газет "Хурзæрин"-ы редактор Цгъойты Арина, журнал "Фидиуæг"-ы редактор Хъодалаты Герсан, ПТРК "Ир"-ы директор Зæгъойты Рада, ИА "Рес"-ы директор Джиоты Алла æмæ ИА "Аланияинформ"-ы директор Бететы Юрий.
