ЦХИНВАЛ, 28 апр — Sputnik. Хуссар Ирыстоны фæсивæды иу къорд 70 адæймаджы скондæй хайад райсдзӕн фæсивæд æмæ студентты XIX æппæтдунейон фестивалы Сочийы, фехъусын кодтой Sputnik фæсивæдон полтикæ, спорт æмæ туризмы комитеты.
Гуырахстджын фæсивæдон мадзал ацæудзæн 14 — 22 октябры Сочийы, фæлæ йæ архайджыты сконд фидар æрцыд ныридæгæн.
"Хуссар Иры номæй XIX æппæтдунейон фестивалы Сочийы архайдзысты 70 активон ӕвзонг адæймаджы. Фидар æрцыд командæйы сконд, фæсивæдон организацитæ æмæ уæлдæр ахуыргæнæн уагдон бавдыстой сæ минæвæртты. Ныр уыдонӕн ардыгæй фæззæгмæ ис рæстæг фестивальмæ сæхи цæттæ кæнынæн", — загъта комитеты кусӕг Гатыгкоты Валентина.
Йӕ ныхӕстӕм гӕсгӕ, фестиваль æрбамбырд кæндзæн йе сконды 20 000 æвзонг адæймаджы онг дунейы 150 бæстæйæ, уыдонæй 8 мин хайадисӕджы æрцæудзæн фæсарæнтæй. Иу фæзуатыл æрæмбырд уыдзысты 18-35 кары фæсивæдон раздзогтæ хицæн фадгуытæй — журналистикӕ, спорт, сфæлдыстад, IT-специалисттæ, фæсивæдон организациты æмæ политикон партиты разамонджытæ, æвзонг ахуыргæндтæ æмæ амалиуæггæнджытæ.
"Мадзалӕн ис хъæзныг нывæзт — цæудзæн лекцитæ, дискусситæ актуалон фарстытыл, спортивон ерыстæ, культурон мадзæлттæ. Развæлгъау куыд бæрæг у, афтæмæй фестивалы сæйраг темæтæ уыдзысты: "Культурæ æмæ глобализаци", "Глобалон экономикæ", "Зонындзинæдты экономикæ", "Ӕхсæнадон институтты райрæзт", "Политикæ æмæ æхсæнадæмон æдасдзинад", — бафтыдта йæ ныхæстæм спорткомитеты минӕвар.
Уымæй дарддæр ма, бафтыдта Гатыгкоты Валентина, мадзалы алкæцы бон дæр нывонд уыдзæн дунейы кæцыдæр хицæн регионæн, фестиваль балхынцъ кæндзысты Уæрæсейыл уынаффæйы бонæй.
Фестивалы кусæгон æвзæгтыл нымад цæуынц ИНО-йы 6 официалон æвзаджы: англисаг, арабаг, испайнаг, китайаг, уырыссаг æмæ французаг.
Фæсивæд æмæ студентты æппæтдунейон фестиваль Уæрæсейы уагъд цӕудзӕн ныр ӕртыккаг хатт. Фыццаг дыууæ хатты мадзал УФ территорийыл ацыд 1957 æмæ 1985 æзты.
