ЦХИНВАЛ, 28 апр — Sputnik. РХИ паддзахадон æдасдзинады комитет бакодта уголовон хъуыддаг хъæууон хæдзарады министры хæстæ æххæстгæнæг Плиты Виталийы ныхмæ, фехъусын кодтой Sputnik ведомствæйы пресс-службæйы.
Уголовон хъуыддаг баконд æрцыд хъæууон хæдзарады министрады дæлбар паддзахадон куыстуаты бюджетон фæрæзтæ ныппаплой кæныны фæдыл "Фæлывддзинад" статьямæ гæсгæ.
"Уголовон хъуыддаджы развæлгъау равзæрсты рæстæджы, 27 апрелы азымгонды хуызы ахст æрцыдысты хъæууон хæдзарады министры хæстæ æххæстгæнæг Плиты Виталий Суликъойы фырт æмæ æмбæстаг Джиоты Александр Димитры фырт", — банысан кодтой ПӔК-ы.
Барадхъахъхъæнæг органтæ уадзынц слестгæнæн мадзæлттæ.
Плиты Виталий лæвæрдта къухдариуæгад хъæууон хæдзарады министрадæн дыууæ хатты — 1998-2001 æмæ 2015-2017 азты.
2012-2015 азты та Плиты Виталий уыд Хуссар Ирыстоны Знауыры районы администрацийы сæргълæууæг.