ЦХИНВАЛ, 4 май — Sputnik, Годжысаты Анна. Ахуыры азы агъоммæ райдиан кълæсты ахуыргæнинæгты ныййарджыты иууыл стырдæр сæрниз свæййы сæ сывæллæтты бацæттæ кæнын. Скъолайы хызынтæ, чингуытæ, пеналтæ æмæ æндæр дзаумæттæ асайынц стыр хæрдзтæ бинонты бюджетæй. Ӕмæ дыууæ-æртæ скъоладзауы та цы бинонтæм ис? Бирæтæ сæ къухтæ ауадзынц.
Скъолайы библиотекæтæн алыхатт нæ вæййы фадат сывæллæтты сифтонг кæнын чингуытæй. Ӕмæ сын кæд чингуытимæ "атулы", уæддæр сæ уыдонмæ хъæуы æлхæнын кусæгон тетрæдтæ. Уæйгæнджытæ арæх не сразы вæййынц уыдон чингуытæй хицæнæй уæй кæнын, зæгъгæ цæуынц комплекты.
"Мæ хистæр сывæллон у райдиан кълæсты ахуыргæнинаг. Ахуыры азмæ мын бахардз вæййы æхсæз мин соммæ æввахс, æмæ уый æнæ канцыларон дзаумæттæ æмæ кусæгон тетрæдтæй", — дзуры дыккæгæм къласы ахуыргæнинаджы мад Наталья.
Коцты Иринайы дыууæ сывæллоны дæр ахуыр кæнынц кæстæр кълæсты, алкæмæн дæр сæ хъæуы 3,5 мин сомы æрмæст чингуытæн.
"Ныфс нын æвæрынц, фидæн аз уавæр кæй фæивдзæн æмæ чингуытæ иууылдæр лæвæрд кæй цæудзысты скъолайы библиотекæйы", — катай кæны уый.
Ныййарджытæй чидæртæ бадзурынц чингуытæ ивын: хистæр кълæстæ сæ раттынц кæстæртæн. Лæварæй, науæд та асламдæр аргъыл, дуканиимæ абаргæйæ.
"Уый бæрæг хуыздæрырдæм æндавы хæрдзты иумæйаг суммæйыл, фæлæ уæддæр тетрæдтæ æмæ æндæр чингуытыл бахардз вæййы æртæ мин соммæ æввахс", — дзуры дыууæ ахуыргæнинаджы мад Заринæ.
Раздæр-иу скъоладзаутæн æнæмæнгхъæуæг чингуытæ дæттой скъолаты библиотекæты æнæаргъæй. Бахъуыдис ма иу алхæнын хуымæтæг тетрæдтæ, хуызджын гæххæт æмæ контурон картæтæ. Абоны æргътимæ абаргæйæ, уыдон лæууыдысты къапеччытæ.
Хуссар Ирыстоны, цы ран астæуккаг куыстмызд у 10 мин соммæ æввахс, алы ныййарæгæн йæ бон нæу сфæразын ахæм хæрдзтæ.
Ахуырады министрад архайы уавæрæй куыддæрты рахизын. Ведомствæйы дзурынц, ацы аз кæй балхæдтой чингуытæ цалдæр скъолайæн. Фæлæ уыдон нымæц у цъус æмæ сæ алы ахуырадон уагдон нæ райста. Æмæ проблемæ та аскъуыддзаг кæныныл та ацы къахдзæф нæ бандæвта.
