ЦХИНВАЛ, 18 окт — Sputnik. Хуссар Ирыстон дарддæр кæны дипломатон куыст дунейы æрдыгæй республикæ банымайыны æмæ æхсæнадæмон контакттæ фæуæрæхдæр кæныны фæдыл, загъта йæ интервьюйы РИА Новости фæсарæйнаг хъуыддæгты министр Медойты Дмитрий.
Министр ис кусæгон визитимæ Апеннинты (Итали). Уый у йæ дыккаг фæсарæйнаг визит, хуссарирыстойнаг æддагполитикон ведомствæйы сæргълæууæгæй нысан куы æрцыд, уæдæй фæстæмæ.
"Мах нывæндæм нæ контактты географи фæуæрæхдæр кæнын. Уыдон та сты – европæйаг бæстæтæ, Централон Ази æм Латинаг Америкæйы паддзахадтæ, афтæ ма ХПӔ- æмæ ма ирон диаспорæтæ кæм ис, уыцы бæстæтæ", — загъта Медойты Димитрий.
Министр банысан кодта, ФХМ-ы сæргълæууæгæй нысан куы æрцыд ацы аз майы, уæд йæ фыццаг фæсарæйнаг визит кæй сарæзта Уæрæсемæ, "уый та у æмбæрстгонд: УФ у нæ стратегион партнер, кæцыимæ нын ис хæларадон, æфсымæрон ахастытæ".
"Ныр та æрцыд Италимæ визиты рæстæг, ацы бæстæ Советон Цæдисы ныппырхы фæстæ æвдыста цымыдис Хуссар Ирыстонмæ", — банысан кодта министр.
Уый зæрдыл æрлæууын кодта, 1990-æм азты Хуссар Ирыстонмæ кæй æрцыд италиаг профессорты делегаци, кæцытæ активонæй цымыдис кодтой хæсты ныппырхгонд республикæйы уавæрмæ æмæ гуманитарон проблемæтæм.
Министр бафтыдта, уымæн кæй сфидар ис хорз ахастытæ италиаг политиктæ æмæ æхсæнадон архайджытимæ, "кæцытыл мын у æхсызгон ам фембæлын".
