ЦХИНВАЛ, 3 ноя — Sputnik, Козаты Диана. Хуссар Ирыстоны фæндагон службæтæ кусынц æнæ улæфтæй, цæмæй афæдзы кæронмæ балхынцъ кæной ацы азмæ нывæзтгонд уынгты арæзтад, загъта Sputnik ПУК "Дорэкспострой"-ы гендиректор Лалыты Мурæт.
Ацы аз инвестицион программæмæ бацыд 12 уынджы æмæ Фырсыгъдæг Мад Майрæмы аргъуаны раз фæзуаты хæрзарæзтад. Уый тыххæй уæрæсейаг бюджетæй рахицæнгонд æрцыд 471 милуан сомы.
"Ныртæккæ "Дорэкспострой" æмбæрзы асфальтæй Колыты Аксойы уынг. Æмрæстæджы цæуынц куыстытæ Гуыбаты æфсымæрты, Герцены æмæ Сомихæгты уынгтыл", — загъта Лалыты Мурæт.
Йæ ныхæстæм гæсгæ, ноджы ма иу проблемон фадыг – Нарты уынг – хæрзарæзт æрцæудзæн фидæн аз.
Уый ма бафтыдта, ныртæккæ ацы уынгтыл куыст кæй цæуы æрвылбон.
"Фæндаг аразджытæн нæй улæфтытæ. Ӕрæввахс кæны афæдзы кæрон æмæ хъæуы куыстытæ балхынцъ кæнын Ног азмæ. Сæйрагдæр у цæймæй боныгъæд уа хорз", — загъта "Дорэкспострой"-ы гендиректор.
2017 азы инвестпрограммæмæ цы уынгтæ бахаудысты, уыдон сты – Герцены, Дзауы, Скъолайон, Фæсивæдон, Джиойы фырты, Колыты Аксойы, Сомихæгты, Калинины, Кировы, Комаровы, Заводы уынгтæ, афтæ ма Сæрибардзинады фæзуат.
