ЦХИНВАЛ, 17 ноя — Sputnik. Паддзахадон ансамбль "Симд"-ы концерт ацыд Хуссар Ирыстоны столицæйы, цыппæрæмы, цы ран къорд равдыста æххæст гастролон программæ. Ирон кафджытæ снывонд кодтой ралæуд сæ коллегæйæн, адæмон хоры зындгонд артист Хетæгкаты Альбертæн.
Мадзæлтты программæ æрбайгом кодта ирон кафт симд – солисттæ дзы уыдысты Хуыгаты Олеся æмæ Санахъоты Инал. Ансамбль ма сæххæст кодта хъаматимæ кафт, абхазаг кафт, хæххон кафт æмæ æндæртæ. Уымæй дарддæр ма, концерты фæлгæтты ансамбль "Симд"-ы хор сæххæст кодта националон ирон зарджытæ.
Кæсджытæ тынг хъарм райстой гастролон турæй æрыздæхæг ансамблы – йедзаг зал къухæмдзæгъд кодта артисттæн. Концертмæ фæуазæг президент Бибылты Анатолий дæр.
Изæры кæрон концерты организатортæ æмæ аивадуардзытæн бузныджы ныхæстæ загъта коллективы аивадон къухдариуæггæнæг Гаглойты Ростик. Уый ма банысан кодта Хуссар Иры президенты æххуыс дæр.
"Куыд зонут, афтæмæй мах æрыздæхтыстæм Челябинскæй æмæ нын нæ президент йæ командæимæ стыр æххуыс бакодта ацы балцы. Уымæй дарддæр ма, куы æрæздæхтыстæм, уæд президент уæлæмхасæй рахицæн кодта коллективæн æхцайы фæрæзтæ – 2 милуан сомæй фылдæр. Мах фæнды бузныг зæгъын Бибылты Анатолийæн ахæм аудындзинады тыххæй нæ кафты коллективыл", — загъта уый.
