Козаты Ушанг: ӕз дӕн ирон ӕмӕ никӕй дих кӕнын

© Sputnik / FacebookКозаты Ушангы равдыст "Власть цвета"
Козаты Ушангы равдыст Власть цвета - Sputnik Хуссар Ирыстон
Рафыссын
Козаты Ушангӕн Санкт-Петербурджы ахӕм айтыгъдимӕ равдыст цӕуы фыццаг хатт, экспозицийы ис 50 нывы, уыдоны нымӕцы цӕ ног куыстытӕ дӕр.

ЦХИНВАЛ, 19 окт — Sputnik. Хуссар Ирыстоны адӕмон нывгӕнӕг, Уӕрӕсейы сгуыхт нывгӕнӕг Козаты Ушангы куыстытӕн Санкт-Петербурджы "Ног музейы" бӕстыхайы байгом равдыст "Власть цвета", фехъусын кодтой Sputnik РХИ культурӕйы министрады пресс-службӕйы.

Козаты Ушангӕн Санкт-Петербурджы ахӕм айтыгъдимӕ равдыст цӕуы фыццаг хатт, экспозицийы ис 50 нывы, уыдоны нымӕцы цӕ ног куыстытӕ дӕр.

Равдыст бакӕныны цытджын цермонийы хайад райстой Хуссар Ирыстоны хицауады сӕрдары хӕдивӕг Тъехты Алан, культурӕйы министр Остъаты Мӕдинӕ, афтӕ ма Цӕгат Ирыстоны минӕвӕрттӕ дӕр.

"Йӕ куыстыты Козаты Ушанг ӕвдисы йӕ райгуырӕн Хуссар Ирыстоны, гуырдзиаг-ирон хӕст, Беслӕны трагеди, цард ӕмӕ уарзондзинад", — банысан кодтой пресс-службӕйы.

© Sputnik / FacebookКозаты Ушангы равдыст "Власть цвета".
Власть цвета Ушанга Козаева - Sputnik Хуссар Ирыстон
Козаты Ушангы равдыст "Власть цвета".

Нывгӕнӕг йӕхӕдӕг куыд радзырдта, афтӕмӕй ӕнхъӕл нӕ уыд, Петербурджы йӕ афтӕ хорз кӕй райсдзысты. Козаты Ушанг банысан кодта кӕй йын ис ӕртӕ нывӕй конд сери — ирон, къуыдайраг ӕмӕ дыгурон, кӕцы у ирон адӕмы иудзинад ӕвдисӕг.

"Ӕз мӕхӕдӕг дӕн ирон. Ӕз никӕй хицӕн кӕнын. Кӕд ӕй бафиппайдтат, уӕд мӕ куыстыты фылдӕр бӕрцӕй зыны сырх, урс ӕмӕ бур ахорӕнтӕ. Уыдон сты алайнаг хуызтӕ — ирон паддзахадон тырысайы хуызтӕ, нысан кӕнынц хӕстон хъӕбатырдзинад, хъӕздыгдзинад ӕмӕ моралон сыгъдӕгдзинад. Ӕртӕ сӕйраг цӕдзындж, кӕцытыл хъуамӕ ӕнцой кӕна не ‘хсӕнад", — банысан кодта Козаты Ушанг.

Равдысты байгоммӕ ма "Ног музей" рауагъта нывгӕнӕджы цард ӕмӕ сфӕлдыстады тыххӕй чиныг.

© Sputnik / FacebookКозаты Ушангы равдыст "Власть цвета".
Власть цвета Ушанга Козаева - Sputnik Хуссар Ирыстон
Козаты Ушангы равдыст "Власть цвета".

 

Равдыст бакӕныны фӕлгӕтты ма Хуссар ӕмӕ Цӕгат Ирыстоны минӕвӕрттӕ дидинтӕ сӕвӕрдтой Уӕрӕсейы аивӕдты Академийы кӕрты Хетӕгкаты Къостайы цыртыл.

Козаты Ушангы равдыст гом уыдзӕн суанг 6 декабрмӕ. Уымӕй размӕ ма йӕ куыстытӕн равдыстытӕ уыд Мӕскуыйы, Гамбургы, Токиойы, Пекины, Мадриды, Цхинвал ӕмӕ Дзӕуджыхъӕуы. Козаты Ушанг у абстрактон экспрессионизмы ирд минӕвар.

Хуссар Ирыстоны адӕмон нывгӕнӕг, Уӕрӕсейы сгуыхт нывгӕнӕг Козаты Ушанг каст фӕцис Цхинвалы Тугъанты Махарбеджы номыл нывгӕнӕн ахуыргӕнӕндон. Йӕ куыстытӕ сты тынг популярон ӕппӕт дунейы дӕр. У Уӕрӕсейы Аивӕдты академийы уӕнг-корреспондент. Райгуырӕн бӕстӕйы сӕрвӕлтау тохты тыххӕй хорзӕхджын ӕрцыд Хуссар Ирыстоны уӕлдӕр паддзахадон хорзӕх — орден "Уацамонгӕ"-йӕ.

Ног хабӕртты лентӕ
0