ЦХИНВАЛ, 21 фев — Sputnik. Джиоты Анатолий, кӕцы ивгъуыд къуыри фехъусын кодта йӕ президентон амбициты тыххӕй, нӕ райсдзӕн хайад президентон кампанийы, загътой Sputnik Хуссар Ирыстоны ЦӔК-ы пресс-службӕйы.
Дыццӕджы Цхинвалы хъуамӕ уагъд ӕрцыдаид Джиоты Анатолийы раразмӕ кӕныны фӕдыл инициативон къорды ӕмбырд. Фӕлӕ фембӕлдмӕ ӕрбацӕуӕг журналисттӕ Профцӕдисты залы никӕй ӕрбаййӕфтой.
"Джиоты Анатолий раздӕр бон фехъусын кодта ЦӔК-ӕн, кӕй иуварс кӕны йӕхи президентон дугътӕй", — загътой Централон ӕвзарӕн къамисы.
Джиоты Анатолий ма фӕлвӕрдта президенты бынатмӕ бацӕуын 2012 азы, фӕлӕ нӕ ахыз паддзахадон ӕвзӕгтӕ зонынады фӕлварӕн.
Уымӕй раздӕр ма ноджы иу претендент Гаглойты Хох систа йӕ кандидатурӕ, уымӕн ӕмӕ нӕ ӕрӕмбырд кодта инициативон къорды ӕмбырд ауадзынӕн фаг адӕмы нымӕц.
Абоны онг уал, республикӕйы сӕйраг постмӕ ис авд претенденты — архайгӕ ӕмӕ раздӕры президент Тыбылты Леонид ӕмӕ Кокойты Эдуард, парламенты спикер Бибылты Анатолий, ПӔК-ы кусӕг Гаглойты Алан, амалиуӕггӕнӕг Багаты Амиран, депутат Къозонты Алан ӕмӕ ӕхсӕнадон архайӕг Гӕбӕраты Нар.
