"Театралон дæсниад" ӕрӕмбырд кодта курдиатджын фӕсивӕды ӕппӕт республикӕйӕ

© Sputnik / Плиты ФатимаЦхинвалы байгом фестиваль "Театралон дæсниад",
Цхинвалы байгом фестиваль Театралон дæсниад, - Sputnik Хуссар Ирыстон
Рафыссын
Фестиваль "Театралон дæсниад"-ы фӕлгӕтты курдиатджын фӕсивӕд театры сенӕйыл ӕвдисынц ирон фысджыты уацмыстӕ ӕмӕ Нарты кадджыты таурӕгътӕм гӕсгӕ бацӕттӕгонд пьесӕтӕ.

ЦХИНВАЛ, 7 дек — Sputnik, Плиты Фатимӕ. Цхинвалы байгом фестиваль "Театралон дæсниад", сценӕйыл сӕ арӕхстдзинад фӕлварынц курдиатджын скъоладзаутӕ республикӕйы алы къуымтӕй.

Ивгъуыд азы Хуссар Ирыстоны скъолаты конд ӕрцыдысты театралон кружоктӕ. Алы скъолайы дӕр курдиатджын фӕсивӕдимӕ кусынц аивады фадыджы специалисттӕ, фылдӕр бӕрцӕй драмон театры артисттӕ. Уыдонӕн афӕдзы дӕргъы цы бантыст базонын, ахуырдзауты курдиат куы раргом кодтой, уымӕн ацы фестивалы саргъ кӕндзӕн компетентон жюри.

Къуырисӕры фестивалы фӕлгӕтты сӕ бацӕттӕгонд чысыл спектаклтӕ ӕвдисынц фондз скъолайы. Сценӕйы фидӕны стъалытимӕ кусы актрисӕ Битеты Милена дӕр, уый цӕттӕ кӕны Цхинвалы фарастӕм скъолайы ахуырдзауты.

"Дыууӕ мӕймӕ ӕввахс кусӕм Уанеты Владимиры уацмыс "Фӕндӕгтӕ" сӕвӕрыныл ӕмӕ абон равдисдзыстӕм нӕ куыст. Сывӕллӕттӕ сӕхӕдӕг дӕр ӕнӕрхъӕцӕй ӕнхъӕлмӕ кӕсынц сӕ радмӕ", — радзырдта Sputnik аивадон къорды къухдариуӕггӕнӕг.

Фестивалы уагӕвӕрдмӕ гӕсгӕ, скъоладзаутӕ бацӕттӕ кодтой чысыл номыртӕ ирон ӕвзагыл ирон фысджыты уацмыстӕм гӕсгӕ. Сывӕллӕтты курдиатджын архайдӕй дарддӕр ма цӕсты хауы, ӕвзонг артисттӕ алкӕцы номырмӕ дӕр аккаг декорацитӕ кӕй сарӕзтой, уый.

© Sputnik / Плиты ФатимаЦхинвалы байгом фестиваль "Театралон дæсниад",
Цхинвалы байгом фестиваль Театралон дæсниад, - Sputnik Хуссар Ирыстон
Цхинвалы байгом фестиваль "Театралон дæсниад",

Цхинвалы скъола-интернаты ахуырдзауты къорд бацӕттӕ кодта Нарты кадджытӕй чысыл скъуыддзаг. Декораторты фӕрцы театры сценӕйыл ӕрзад Нарты фӕткъуы.

Фестивалы иууыл ӕвзонгдӕр хайадисджытӕ та ӕрцыдысты Дзауӕй, уыдон алыварсонӕй равдыстой хъӕууон цардуаг: хъӕмпӕй худ, цъындатӕ, хӕдзарон мигӕнӕнтӕ, суанг ма дзоныгъ дӕр рахастой сценӕмӕ.

Фӕсивӕды архайдӕн аргъ кӕны жюри, йе сконды сты РХИ сгуыхт артист Пӕррӕстаты Дмитрий, РХИ сгуыхт нывгӕнӕг Ӕлборты Ӕхсӕртӕг, музыкалон скъолайы директор Гӕджиты Жанеттӕ ӕмӕ "Симд"-ы солисткӕ Хуыгаты Олеся.

Фестиваль бакӕныны церемонимӕ Паддзахадон драмон театры артисттӕ бацӕттӕ кодтой театралон равдыст. Фестивалы финал уагъд ӕрцӕудзӕн дыццӕджы, 8 декабры. Сӕ курдиат ӕмӕ архайдмӕ гӕсгӕ равзардзысты аккагдӕрты 10 номинацийы — хуыздæр пьесӕ, сылгоймаджы ӕмӕ нæлгоймаджы хуыздӕр фӕлгонцтӕ, хуыздæр дарæс, сценографи ӕмӕ ӕндӕртӕ.

Мадзал уагъд цӕуы РХИ фæсивæдон политикæ, спорт æмæ туризмы комитет æмæ ахуырады министрады хъæппæрисæй Хетӕгкаты Къостайы номыл паддзахадон драмон театры труппӕйы æххуысæй.

Ног хабӕртты лентӕ
0