Цы фесты цхинвайлаг абанатӕ

© Sputnik / Фатима ПлиеваЦхинвалы абана
Цхинвалы абана - Sputnik Хуссар Ирыстон
Рафыссын
Абанатæ фидар кæнынц æнæниздзинад, сурынц уазалдзыд, нымайынц сӕ фæллад уадзыны хуыздæр амæлттæй иуыл. Хуссар Ирыстоны абанатæн дӕр фæстаг æзты ис сæхи хицӕндзинад - æхгæд дуæрттæ

ЦХИНВАЛ, 23 июн — Sputnik, Плиты Фатимӕ. Цхинвайлæгтæн нæй фадат зындгонд кинонывы хъайтартау Ног азы къæсæрыл кӕнӕ ӕндӕр бонты абанамæ ацæуын — горæты дыууæ æхсæнадон абана дӕр лæууынц æхгæд дуæрттимæ. Уыдон хъысмæт баййæфта "цæлхытыл абана" дæр, "пар" уарзджыты цæстæнгас ныр та ʻздæхт у Тъбеты ног уырыссаг банямæ.

Еналдыты Мурик - Sputnik Хуссар Ирыстон
Еналдыты Мурат: куыд бабын ис Хъæды комбинат

Хуссар Ирыстоны сæйраг сахары раздӕр куыста дыууæ æхсæнадон абанайы — Ирæтты æмæ 8-æм июны уынгтыл. Цхинвалы ивгъуыд ӕнусы 90-ӕм æзты уæззау рæстæджыты хъарм дон цы хӕдзӕртты уыд, уыцы бинонтӕ нымад цыдысты хъæзныг цæрджыгыл. Иннæ адӕм иуулдӕр сæхи найынмæ дæр цыдысты абанатæм.

Кæд сыгъдæгдзинады тыххӕй абон абантæм ничиуал тырны, уæддæр æцæг "баня"-мӕ ацæуынмæ бæллынц бирæтæ. Абанатæ фидар кæнынц æнæниздзинад, сурынц уазалдзыд, нымайынц сӕ фæллад уадзыны хуыздæр амæлттæй иуыл. Япойнаг сэнто, туркаг хамам, финаг сауна æмæ уырыссаг баняйæн сæ нæмттæ айхъуыстысты дæрддыл, алкæмæн дæр сӕ дунейы ис йæхи табугæнджытæ, ис сын хицæн æндæвдад æнæниздзинадыл.

Хуссар Ирыстоны абанатæн дӕр фæстаг æзты ис сæхи хицӕндзинад — æхгæд дуæрттæ. Хицæн рæстæджыты ныфсытæ фæзынд се ‘скусын кæнынæй, ивд цыдысты сæ арендатортӕ, цалдæр азы размæ Инвестицион нывæзты дæр нысан æрцыд, фæлæ йӕ цӕмӕдӕр гӕсгӕ не сфидар кодтой.

8-æм июны уынгыл уæвæг абана ис Цхинвалы администрацийы дӕлбар. Мэры ныхæстæм гæсгæ, бæстыхай сӕндидзын кæнынӕн нал бӕззы ӕмӕ у ныппырх кӕнинаг.

"Абанатæ горæты хъæуынц æнæдызæрдыгæй. 8-æм июны уынгыл уæвæг абанайы бæстыхайы, развæлгъау экспертизæмæ гæсгæ, сцалцæггæнæн нал ис, хъæуы йӕ ныккалын. Кæд гæнæн фæзына, уæд архайдзыстæм цæмæй арæзт æрцæуа ног абана", — загъта Цхинвалы мэр Коцты Алан.

Стырдӕр æхсæнадон абана та ис арендаторы къухы ӕмӕ уый дӕр æрдæгхæлдæй ӕхгӕд дуӕрттимӕ фæлгæсы Ирæтты уынгыл, халы горæты æддаг хуыз, йæ бацæуæнтӕ фесты кæрдæджы бын. Йæ арендатор, депутат Тасойты Дмитрий та ныфс æвæры хицауадæй.

"Ацы абана арӕзт куы цыд, уӕд дзы хисæрмагонд фæрæзтæ нывæрдтам 400 мин доллары. Мах балæвар кодтам республикæйæн гигиенæйы хæдзар, кæцы бирæ категоритæн уыд æнӕаргъ, уыдон нымæцы Стыр Фыдыбӕстӕйон æмæ 1989-1992 —æм æзты Фыдыбæстæйон хæстыты ветерантæн, сидзæр сывæллæттæн, спортсментæн æмæ а.д", — радзырдта Sputnik Тасойты Дмитрий.

© Sputnik / Фатима ПлиеваЦхинвалы абана
Баня Южная Осетия - Sputnik Хуссар Ирыстон
Цхинвалы абана

Йӕ ныхӕстӕм гӕсгӕ, 2004 азы гуырдзиаг-ирон ныхмӕлӕудты æндыгъд рӕстӕджы абана рохуаты аззад æмæ æрцыд æдзæллаг уавæрмæ.

"Уӕдӕй фæстæмæ куыста фæлæудтимæ, хæстон рæстæджы йӕм æмбæлон хъусдард здæхт нал цыд. 2008 азы хаст æрцыд Инвестицион нывæзтмæ, фæлæ йæ фæстæдæр систой. Хатыдыстæм экс-президенттæ Кокойты Эдуард æмæ Тыбылты Леонидмæ дæр, фæлæ ницы фæстиуæгмæ æркодтой. Абана та æгас паддзахады хъуамæ æнæмæнг уа", — балхынцъ кодта Тасойты Дмитрий.

Цхинвалы абанайы нæуæвынад тыхсын кæны канд бынæттонты нæ, фæлæ ма республикæйы уазджыты дæр — аразджытæ, æфсæддонтæ æмæ туристты дисы бафтауы, æгас республикæйы иу абана дæр кæй нæ куысы, уыцы мæгуырау хъуыддаг.

Ацы уавæрмæ кæсгæйæ, Цхинвалы цæрæг Тыбылты Георгий дыууæ азы размæ æркодта Цхинвалмæ "цæлхытыл абана", фӕлӕ уый дӕр уайтагъд баййӕфта ӕхсӕнадон абанаты хъысмӕт. Йӕ куыст размӕ нæ рацыд ӕмӕ йӕ йӕ хицау фӕхицӕн кодта йæ цæлхытæй.

"Дыууæ азы мæм ис ацы абана, бирæтӕ йӕ агуырдтой, фæлæ йын кусæг не ʻсардон. Йæ хæдтулгæ уал ын ныууæй кодтон, йæ хатæн та æнæхъуаджы æмæ йæ хъахъхъæны фыййауы куыдз. Уый дӕр ауӕй кӕндзынӕн æвæццæгæн", — дзуры цæлхытыл абанайы хицау Тыбылты Георгий.

© Sputnik / Фатима ПлиеваЦæлхытыл абана
Баня Южная Осетия - Sputnik Хуссар Ирыстон
Цæлхытыл абана

Ӕгас Хуссар Ирыстоны иу абана дæр кӕй нæ кусы, стӕй ма æхсæнадон абанаты асæст перспективӕтæм кæсгæйæ, цхинвайлæгтæ цалдӕрӕй сарӕзтой хъæдын уырыссаг баня Тъбеты.

"Ме ʻмгæрттимæ ӕртӕйӕ нæхицæн сарӕзтам дыууæуæладзыгон бæстыхай, уыдзæн дзы уырыссаг баня душтимæ, тæфы мæцæн хатæнтæ æмæ бассейн. Дзæуджыхъæуы иу сахат лæууы 1500-2000 сомы, уырдæм цæуыны бæсты йæ ам сарæзтам нæхицæн, фæстæдæр æй гæнæн ис дæттæм арендæйы дæр", —радзырдта йӕ хицау Уазæгты Зура.

© Sputnik / Фатима ПлиеваТъбеты ног уырыссаг баня
Тъбеты ног уырыссаг баня - Sputnik Хуссар Ирыстон
1/2
Тъбеты ног уырыссаг баня
© Sputnik / Фатима ПлиеваТъбеты ног уырыссаг баня
Тъбеты ног уырыссаг баня - Sputnik Хуссар Ирыстон
2/2
Тъбеты ног уырыссаг баня
1/2
Тъбеты ног уырыссаг баня
2/2
Тъбеты ног уырыссаг баня

Иудзырдӕй, цхинвайлаг "паруарзджыты" цæстæнгас ныр та ʻздæхт у Тъбеты ног уырыссаг банямæ — кӕд иу сӕ уырдӕм уӕддӕр бауадзиккой йӕ хицӕуттӕ.

Ног хабӕртты лентӕ
0