ЦХИНВАЛ, 4 май — Sputnik. Хуссарирыстойнаг боксертӕ Ессентукийы уагъд цæуæг хъазахъхъæгты æхсæнады атаманы кубок рамбулыны сæраппонд гом турниры рамбылдтой ӕхсӕз сыгъзæрин майданы, сæ аннæ æмбæлццон та бацахста дыккаг бынат, фехъусын кодта Sputnik боксӕй спорты мастер, тренер Дзигойты Ацæмæз.
"Турнирмæ æдæппæтæй акодтон 7 лæппуйы, уыдонæй фондз мæхи хъомылгæнинæгтæ æмæ дыууæ та фæндзæм скъолайы уæвæг боксы скъолайы спортсментæ. Уæлахиздзаутæй æрыздæхтысты Багаты Марат, Бабаты Станислав, Джиоты Арсен, Гæджиты Гурам, Мæргъиты Игорь, Кокойты Лев, дыккаг бынат та бацахста Хаситы Сослан", — радзырдта тренер.
Дзигойты Ацæмæз ма бафиппайдта, æнæ ерыстæй аккаг боксертæ схъомыл кæнæн кӕй нæй æмæ та мæйы кæрон сæхи срæвдз кæндзысты ног турнирмӕ.
"Сывæллæттæ хъуамæ архайой ерысты, уым исынц фæлтæрддзинад. Уæлахизтæ сæ разæнгард кæныц ног æнтыстытæм, къуыхцыта та сæ фылдæр кусынмæ рæвдз кæныц. Æрмæст тренировкæтæй мах фидæны боксерты не ʻсхъомы кæндзыстæм. Уымæ гæсгæ ныр та нæхи цæттæ кæнæм 26-27 майы цæгатирыстойнаг турнирмæ", — бафтыдта йæ ныхæстæм тренер.
Хазахъхъæгты æхсæнады атаманы кубок рамулыны сæраппонд гом турнир цыд Ессентукийы. Архайдтой дзы 100 боксеры онг Мæхъæл, Цæцæн, Дагестаны республиктæй, Минвод, Пятигорск, Ставрополь æмæ Цæгат Кавказы æндæр горæттæй.