ЦХИНВАЛ, 15 май — Sputnik, Болататы Алина. Хæххон-металлургон техникумы студент — 19-аздзыд Казимир Мантаев — зынсирвæзтæй рахаста чысыл чызджы, фехъусын кодта Цæгат Ирыстоны УУМ-ы пресс-службæ.
Уагдон куыд хъусын кæны, афтæмæй лæппуйы хъæбатыр ми нæ раргом уыдаид, кæд æмæ уый тыххæй уæлвæткон уагдоны минæвæрттæн нæ радзырдтаит æрыгон лæппуйы тренер. Казимир Мантаев йæхæдæг нымайы, кæйдæр бæллæхы фæрсты кæй нæ ахызт, уымæй дарддæр æхсарджынæй кæй ницы сарæзта.
Цауы хайадисæг Казимир ссис æнæнхъæлæджы. Ахуырадон уагдоны кæрты лæугæйæ, федта сыхаг фондзуæладзыгон фатерты рудзгуытæй кæй цæуы фæздæг. Уайтагъд атындзыдта цауы бынатмæ.
"Ӕз фыццаг нæ уыдтæн, уырдæм чи æрбалыгъд. Уым уæдмæ уыдысты сыхæгтæ, нæ студенттæ, алыгъуызон службæтæ. Бахатыдтæн мæ зонгæтæм мидæмæ бахизын, фæлæ ничи сразы. Уæд ацыдтæн иунæгæй. Сыгъдхуыссынгæнджытæ мæ нæ уагътой, зæгъгæ, тæссаг у, фæлæ уæддæр бацыдтæн", — дзуры Казимир.
Фæндзæм уæладзыгмæ куы схызт, уæд лæппу уайтагъд райдыдта æххуыс кæнын сыгъдхуыссынгæнджытæн. Фатертæн сæ фылдæры ничи уыд — æрмæст ма иуы уыдысты сылгоймæгтæ сывæллонимæ. Казимир фелвæста сывæллоны, йæхимæ йæ æрбалхъывта æмæ атагъд кодта бынмæ.
Сынгзирвæзтты рæстæджы æрыгон лæппу бавзæрста алыхуызон æнкъарæнтæ, фæлæ куыд дзуры афтæмæй, уыдоны æхсæн тасы æнкъарæн нæ уыд. Артæфтыд бæстыхайы куыд уыд, уæд кæд басыгъды продукттæ фæулæфыд, уæддæр йе 'нæниздзинадæн зиан нæ бакодтой.
УУМ-ы пресс-службæйы банысан кодтой, Казимиры Мантаевы кандидатурæ раразмæгонд кæй æрцæудзæн номинаци "Зæрдæйы сидты фæдыл"-ы, æдасдзинад æмæ адæмы ирвæзты тематикæйы фæдыл æппæтуæрæсейаг фестиваль "Созвездие мужества"-йы.
