ЦХИНВАЛ, 26 авг — Sputnik. Хуссар Ирыстоны хæдбардзинад Уæрæсейы æрдыгæй банымайыныл 9 азы сæххæсты цытæн бæрæгбонон мадзæлттæ балхынцъ сты Цхинвалы Ногдзауты парчы ирон хъазт "Уазæгуаты Аланты фæсивæдмæ"-йæ. Мадзалы сæ арæхстдзинад равдыстой Дзауы районы сфæлдыстадон коллективтæ æмæ Хуссар Ирыстоны паддзахадон университеты хореографион къорд "Сæрмæт".
Симд, хонгæ æмæ æндæр кæфтытæ кæрæдзи ивтой. Дзауы районы культурæйы хайады дæлбар хор æмæ районы æндæр сфæлдыстадон къордтæ – "Нартæ", "Скиф", "Фидæн" æмæ æндæртæ сæххæст кодтой ирон зарджытæ æмæ кæфтытæ. Профессионалон коллективтæй дарддæр ма симды бацыдысты æрæмбырдуæвджытæй иууыл ныфсхасттæ дæр.
Хъазты цур фенæн уыд хæдбардзинады банымадыл 9 азы сæххæстæн нывонд фотоконкурс "Южная Осетия-Алания-2017"-йы архайджыты куыстæй. Культурæйы министрады цур адæмон сфæлдыстады республикон центры фоторавдысты фенæн уыд Ирыстоны æрдз, портретон нывтæ æмæ зындгонд гоймæгты хуызисттæ.
Бæрæгбонæн нывонд цытджын мадзӕлттӕ фӕуыдзысты салютӕй изæры 9 сахатыл.
Хуссар Ирыстоны хӕдбардзинад официалонӕй нымад ӕрцыд Уӕрӕсейы президент Дмитрий Медведевы сӕрмагонд барамындӕй 2008 азы 26 августы. Ацы политикон актӕн уыд егъау нысаниуӕг йӕ сӕрибардзинад ӕмӕ хӕдбардзинадыл тохгӕнӕг адӕмы хсӕн – кӕронмӕ бахӕццӕ сӕ бирӕазон ӕмӕ уӕззау фӕндаг ӕхсӕнадӕмон банымадмӕ.
