ЦХИНВАЛ, 12 мар – Sputnik, Гӕбӕраты Ян. Хуссар Ирыстоны абоны онг нӕй коронавирусӕй фӕрынчынуӕвджыты сбӕрӕг кӕныны цаутӕ, фӕлӕ ныридӕгӕн апарахат сты дам-думтӕ, фӕсарӕнтӕй ӕрыздӕхӕг сылгоймагыл, кӕцы йӕхӕдӕг у медик, кӕй бахӕцыд вирус.
Фӕлӕ уыцы информаци нырма ничи бафидар кодта - нӕдӕр медиктӕ, нӕдӕр Ӕнӕниздзинад хъахъхъӕнынады министрады.
Уыд ахӕм цау Ленингоры районы дыууӕ цӕрӕгимӕ, кӕцытӕ ӕрӕджы ӕрбаздӕхтысты Гуырдзыстонӕй ӕмӕ не сразы сты ахӕм рӕстӕджы ӕнӕмӕнгхъӕуӕг дыууӕкъуырион карантиныл (ацы уынаффӕ райстой цалдӕр боны размӕ республикӕйы хицауады). Ӕнӕниздзинад хъахъхъӕнынады министрады минӕвар куыд банысан кодта, афтӕмӕй уыцы дыууӕ сылгоймаг вирусхӕссӕг кӕй сты, уыцы дам-думтӕн бындур нӕй, фӕлӕ процедурӕ алкӕмӕн дӕр у иугъуызон ӕмӕ йӕ алчидӕр хъуамӕ рацӕуа, науӕд тӕссаг у, вирус кӕй ӕрбахиздзӕн республикӕйы территоримӕ.
Ленингоры районы сӕргълӕууӕг Мамытаты Виталий куыд радзырдта, афтӕмӕй ныртӕккӕ районы рынчындоны карантиныл ис иу пациенткӕ, кӕцы ӕрӕджы ӕрыздӕхт Гуырдзыстонӕй.
Коронавирусӕй фыццаг рынчыны фӕдыл дам-думтӕ аиуварс кодта Хуссар Ирыстоны сӕйраг инфекционист Джиоты Элеонора дӕр.
"Фидарӕй уын зӕгъын, абоны онг махмӕ республикӕйы кӕй нӕй коронавирусӕй фӕрынчынуӕвджытӕ", - банысан кодта уый.
Инфекционист бафӕдзӕхста, ацы дам-думтӕ кӕй расайдзысты сӕ фӕстӕ паникӕ ӕхсӕнады ӕмӕ ӕрсидт цӕрджытӕм, цӕмӕй сӕхи бахизой фӕсарӕнтӕм балцытӕй ӕмӕ ӕххӕст кӕной КРВИ пролфилактикӕйы сӕйраг мадзӕлттӕ.
