ЦХИНВАЛ, 1 мар — Sputnik, Болататы Алина. Планетарийы бӕстыхай Дзӕуджыхъӕуы баззайдзӕн Цӕгат Ирыстоны исады, фехъусын кодта паддзахадон исад ӕмӕ зӕххы ахастыты фӕдыл министр Тедеты Руслан.
Йӕ ныхӕстӕм гӕсгӕ, министрадмӕ цӕуы тынг бирӕ куырдиӕттӕ динон, фӕсивӕдон ӕмӕ ӕхсӕнадон организацитӕй. Уыдон курынц, цӕмӕй сын объект раттой арендӕйы, иуӕй иутӕ та курынц, цӕмӕй сын ӕй раттой бынтондӕр. Фӕлӕ министр фехъусын кодта, Планетарий хъахъхъӕд кӕй ӕрцӕудзӕн куыд культурон бынты объект.
"Планетарий махӕн ис иудадзыг контролы бын. Алкӕмӕн дӕр хъусын кӕнын — нӕдӕр ӕй арендӕйы дӕттӕм, нӕдӕр ӕй уӕй кӕнӕм, нӕдӕр ӕй лӕвар кӕнӕм. Планетраий у культурон бынты объект. Ӕмӕ йӕ мах бахъахъхъӕндзыстӕм, куыд планетарий", — банысан кодта Тедеты Руслан.
Уый радзырдты бӕстыхай реконструкцийы фӕдыл нывӕзтты тыххӕй. Йӕ ныхӕстӕм гӕсгӕ, цыдысты бадзырдтӕ мӕскуыйаг специалисттимӕ, фӕлӕ "аргъыл нӕ бафидыдтой".
Министр ма бафтыдта, Цӕгат Ирыстоны сӕргълӕууӕг кӕй контроль кӕны историкон бӕстыхайы хъысмӕт. Цалцӕггӕнӕн куыстытӕ ис гӕнӕн ӕмӕ райдайой 2018 азы.
