04:58 23 СУСÆНЫ МÆЙ
 2018
Комкоммӕ эфир
  • EUR73.93
  • USD63.49
Хетæгкаты Къоста

Къостайы преми: аив дзырды дæснытæм сидынц конкурсмæ

© Sputnik / Наталья Айриян
Цӕгат Ирыстон
Чысыл дӕнцӕг
31 0 0

Хетæгкаты Къостайы номыл преми Цæгат Ирыстоны лæвæрд цæуы 1964 азæй фæстæмæ

ЦХИНВАЛ, 10 апр — Sputnik. Цæгат Ирыстоны сидынц аив дзырды дæснытæм Хетæгкаты Къостайы премийыл тохмæ, хъусын кæны Цæгат Ирыстон-Аланийы сæргълæууæджы сайт.

Хетæгкаты Къостайы номыл премитæ лæвæрд цæуынц Ирыстоны хуссары дæр æмæ цæгаты дæр.

"Цæгат Ирыстоны сæргълæууæджы цур аивады æмæ литературæйы фадыджы Хетæгкаты Къостайы номыл премийы фæдыл къамис хъусын кæны уацмыстæ исыны фæдыл. Ист цæуынц куыстытæ, кæцытæ мыхуыр æрцыдысты 2016-2017 æзты æмæ бахастой стыр хайбавæрд Ирыстоны аивадон культурæмæ. Кандидатты раразмæ кæнын бар ис бынæттон хæдуынаффæйы органтæн, æхсæнадон баиуæгæндтæн, уагдæттæн, организацитæн, ахуырадон уагдæттæн æмæ сфæлдыстадон коллективтæн", — дзырдæуы хъусинаджы.

Куырдиæттæ ист цæудзысты 15 апрелæй 1 июньмæ. 2018 азы Къостайы премийы хицау фæбæрæг уыдзæн гениалон поэты райгуырæн боны — 15 октябры.

Хетæгкаты Къостайы номыл преми Цæгат Ирыстоны лæвæрд цæуы 1964 азæй фæстæмæ. Фыццаг ацы премийы хицау баисты номдзыд лингвист Абайты Уасо æмæ зынгæ фыссæг Мамсыраты Дæбе.

Хицæн æзты премийы аккаг скодтой Ирыстоны зонад, аивад æмæ культурæйæн чи лæггад кодта, ахæм адæм, куыд Ирыстонæй, афтæ æндæр бæстæтæй дæр. Примийы хицæутты номхыгъды ис дунейы нымад ахуыргæндтæ, коллективтæ, аивадон кусджытæ, поэттæ. Се ʻхсæн Жорж Дюмезиль, Дыккайты Шамил, Плиты Грис, Плиты Харитон, Ӕлборты Феликс, Галаты Борис, Дударты Вероника, Бзарты Руслан, Кокайты Тотрадз.

Фæстаг хатт преми радтой 2013-2014, уæд премийы лауреатты ʻхсæн уыд Хуссар Ирыстоны экс-президент, ахуыргонд Цыбырты Людвиг дæр.

Цæгат Ирыстоны æмрæнхъ ма Къостайы преми лæвæрд цæуы Ирыстоны хуссары дæр. Къостайы преми Хуссар Ирыстоны фидар ӕрцыд РХИ президенты указӕй 2009 азы. Уый лӕвӕрд цӕуы дыууӕ азы иу хатт. Хицӕн ӕзты премийы лауреаттӕ уыдысты фысджытӕ Хъазиты Мелитон ӕмӕ Хъодалаты Герсан, историктӕ Гаглойты Роберт, Гаглойты Юрий ӕмӕ ӕндӕртӕ.

Сӕйраг темӕтӕ