ЦХИНВАЛ, 18 дек – Sputnik. Цӕгат Ирыстоны полицийы кусджытӕ ссардтой нӕлгоймаджы, кӕцы 20 азы размӕ нымад ӕрцыд ӕбӕрӕгӕй фесӕфӕгыл, хъусын кӕны республикӕйы МХМ пресс-службӕ.
Хъусинагӕй куыд бӕрӕг у, афтӕмӕй Горӕтгӕрон районы полицийы кусджытӕ сӕ территори куы патруль кодтой, уӕд сӕ цӕст схӕцыд ӕнӕзонгӕ нӕлгоймагыл, цыдаид ыл 60 азы. Йӕ документтӕ йын куы ркуырдтой, уӕд рабӕрӕг, Юрий Коляев ныр 20 азы дӕргъы нымад кӕй у ӕбӕрӕгӕй фесӕфӕгыл.
"Нӕлгоймаг фӕдис ис, уый нӕ зыдта, агуырды кӕй ис, ӕнхъӕлдта, йӕ бинонтӕ йӕ раджы кӕй ферох кодтой. Нӕлгоймаджы тыххӕй полицийы кусджытӕ фехъусын кодтой йӕ раздӕры цӕрӕн бынатмӕ - Ивановы областьмӕ. Уыдон фӕдзырдтой нӕлгоймаджы кӕстӕр чызгмӕ. Йӕ чызгимӕ телефонӕй дзургӕйӕ, Коляев тынг тыхст, йӕ цӕссыгтӕ дӕр нӕ урӕдта", – дзырдӕуы хъусинаджы.
Бинонтӕ куыд фехъусын кодтой, афтӕмӕй бирӕ рӕстӕг агуырды фӕстӕ уыдон аскъуыддзаг кодтой, зӕгъгӕ, ӕвӕццӕгӕн, удӕгас нал у. Цырт дӕр ма йын сӕвӕрдтой ӕгӕрыстӕмӕй сӕ уӕлмӕрды. Йе 'мкъай ног мой скодта, сывӕллӕттӕн фӕзынд сӕхи бинонтӕ.
Юрий Коляев куыд радзырдта, афтӕмӕй хӕдзарӕй ацыд, йӕ бинойнагмӕ йӕ зӕрдӕ куы фехсайдта, уӕд. Уӕдӕй нырмӕ цард Цӕгат Ирыстоны, кодта алыгъуызон куыстытӕ ӕмӕ уымӕй цард. Ныртӕккӕ йын барадхъахъхъӕнӕг органты кусджытӕ цӕттӕ кӕнынц йӕ документтӕ ӕмӕ агурынц адӕймаджы, кӕцы йын балхӕнид билет йӕ райгуырӕн горӕтмӕ ӕмӕ фӕстӕмӕ.
"Мӕ хъӕбулты фендзынӕн ӕмӕ фӕстӕмӕ ӕрыздӕхдзӕн Цӕгат Ирыстонмӕ - ныр мӕ хӕдзар ам ис", – балхынцъ кодта нӕлгоймаг.
