ЦХИНВАЛ, 3 сен — Sputnik. Цхинвалы популярондӕр ахуырадон уагдӕттӕй сӕ иу — рӕстдинон гимнази "Рухс"-ы скъоладзаутӕ гӕнӕн ис ӕмӕ аззайой уынджы. Гимназийӕн йӕхи агъуыст кӕй нӕй, уымӕ гӕсгӕ ахуырадон процесс уадзы Цхинвалы 1-ӕм скъолайы бӕстыхайы.
Скъолайы директор Гобозты Русуданы ныхӕстӕм гӕсгӕ, ацы аз уыдонмӕ ӕрбацыд 120 фыццагкъласоны ӕмӕ сӕ хатӕнтӕ сӕхи фаг дӕр нал кӕнынц. Уый хыгъд бахатыд гимназийы къухдариуӕгадмӕ, цӕмӕй сын ссӕрибар кӕной сӕ кълӕстӕ.
"Мӕнӕн абон фадат нӕй, цӕмӕй нӕ фыццагкъласонтӕн ӕмбӕлон уавӕртӕ саразон. Нӕ хатӕнтӕ нӕхи хъӕуынц. Гимнази у хисӕрмагонд скъола, ис дзы 300 скъоладзауӕй фылдӕр. Уыдонӕй дарддӕр ма не ‘скъолайы агъуысты ахуыр кӕнынц кадеттӕ дӕр, иу ӕуыййас та уыдон сты. Ӕмӕ нӕхи сывӕллӕтты уый тыххӕй бахъуыд къуындӕг уавӕрты ахуыр кӕнын", — банысан кодта Гобозты Русудан.
1-ӕм скъолайы бӕстыхай нымад у ӕрмӕстдӕр 600 ахуырдзауыл, афтӕмӕй та дзы ныртӕккӕ ахуыр кӕнынц иу мин скъоладзауы онг.
"Гимнази дӕр ӕмӕ Кадетон скъола дӕр нӕ бӕстыхайы ахуыр кодтой рӕстӕгмӕ, фӕлӕ ӕзтӕ цӕуын ӕмӕ цӕуынвӕнд нӕ кӕнынц", — дзуры скъолайы директор.
Гимназийы ахуыргӕнджыты ӕмӕ скъоладзауты ныййарджыты ацы хабар баппӕрста мӕты. Цхуырбаты Мадинӕйӕн йӕ дыууӕ саби дӕр цӕуынц гимназимӕ.
"Цӕргӕ дӕр кӕнын Мӕскуыйаг микрорайоны. Мӕ сывӕллӕттӕ кӕд нырма кӕстӕр кълӕсты ахуыр кӕнынц, уӕддӕр сӕхӕдӕг къӕсӕрӕй дуармӕ бацӕуынц скъоламӕ. Ныр нӕ зонын, цы хъуамӕ кӕнӕм дарддӕр", — дзуры ныййарӕг.
Рӕстдинон гимнази "Рухс"-ы директор Джиоты Уырызмӕг радзырдта Sputnik, ахуыргӕнджытӕ ӕмӕ ныййарджытӕ кӕй бацӕттӕ кодтой фыстӕг республикӕйы президенты номыл, цыран курынц, цӕмӕй ахуырадон уагдонӕн рахицӕн ӕрцӕуа бӕстыхай.
Скъолаты ӕхсӕн уал рӕстӕгмӕ хъаугъа ӕрнымӕг ис. Горӕты адмнистрацийы Sputnik уацхӕссӕгӕн куыд фехъусын кодтой, афтӕмӕй цалынмӕ ӕнӕхицауадон скъолатӕн аккаг бӕстыхӕйттӕ ссарой, уӕдмӕ ахуыр кӕндзысты Мӕскуыйаг микрорайоны 1-ӕм скъолайы.
Цхинвалы 1-ӕм скъола ӕрӕзт ӕрцыд горӕты цӕгаттаг хай, Мӕскуыйаг микрорайоны 2008 азы хӕсты фӕстӕ Мӕскуйы хицауады финасон ӕххуысы фӕрцы. Фӕстӕдӕр ам рӕстӕгмӕ сӕ ахуыр райдыдтой Хъахъхъӕнынады министрады дӕлбаруӕвӕг Кадетон скъола ӕмӕ ӕнӕхицауадон рӕстдинон гимнази "Рухс".
