Ног рынчындонмӕ ӕнхъӕлмӕгӕсгӕйӕ Къуайсайӕ уæззау рынчынты ласынц Цхинвалмæ

© Sputnik / Ада БагианКъуаисайы арӕзт цӕуы рынчындон
Къуаисайы арӕзт цӕуы рынчындон - Sputnik Хуссар Ирыстон
Рафыссын
Уæззау рынчынты Къуаисайæ аласынц Цхинвалмæ, кæнæ Дзæуджыхъæумæ, уымæн æмæ дзы нæй уавæртæ рог операци ауадзынæн дæр, загъта бынæттон рынчындоны сæйраг дохтыр.

ЦХИНВАЛ, 1 окт — Sputnik, Козаты Дианæ. Хуссар Ирыстоны дыккаг горӕты — Къуаисайы социалон объекттӕ ацы аз бацыдысты республикӕйы социалон-экономикон райрӕзты Инвестицион нывӕзтмӕ. Нывӕзты фӕлгӕтты горӕты арӕзт цӕуы рынчындон. Sputnik уацхæссæг бабæрæг кодта, цы уавæрты кусынц абон къуаисайаг дохтыртæ ӕмӕ цы æххуыс у сæ бон бакæнын бынæттон цæрджытæн.

Къуайсайаг Тедеты Мурикæн ӕрӕджы йæ къахимӕ фӕзынд проблемӕтӕ. Уый арæх бацæуы бынæттон рынчындонмæ медицинон æххуысы фæдыл.

Нæ бацыды моментмæ Тедеты Мурик уыд рынчындоны иунæг пациент. Йæ ныхæстæм гæсгæ, ам кусы диссаджы дохтыртæ, кæцытæ цыфæнды бахъуыды рæстæджы дæр æрцæуынц æххуысмæ æмæ цы сæ бон у, уый саразынц рынчынæн.

"Нæ горæт стыр нæу, æмæ дохтыртæ уайтагъд балæууынц рынчыны фарс. Уыдонæн ис хъавгæ ахаст рынчынтæм. Æмæ кæд сæ фадæттæ уæрæх не сты, уæддæр аразынц, цы сæ бон у, уый", — дзуры Тедейы фырт.

© Sputnik / Ада БагианТедеты Мурикы ныхæстæм гæсгæ, ам кусы диссаджы дохтыртæ, кæцытæ цыфæнды бахъуыды рæстæджы дæр æрцæуынц æххуысмæ.
Больница в Квайса - Sputnik Хуссар Ирыстон
Тедеты Мурикы ныхæстæм гæсгæ, ам кусы диссаджы дохтыртæ, кæцытæ цыфæнды бахъуыды рæстæджы дæр æрцæуынц æххуысмæ.

Чысыл фæстæдæр рынчындонмæ бацыд ноджы иу пациент. Таймæзты Лалайæн æрæджы сарæзтой операций йæ къухыл, æмæ ныр æрбацыд йæ медицинон баст раивынмæ. Операци йын сарæзтой Дзæуджыхъæуы, фæлæ дарддæры хоскæнынад баууæндыд бынæттон дохтыртыл. Зæгъы, дохтыртæ æнæзивæгæй кæй цæуынц æххуысмæ æрмæст къуаисайæгтæм нæ, фæлæ ма æввахс хъæуты цæрджытæм дæр.

Абон рынчындоны кусынц дыууæ дохтыр-терапевты, педиатр æмæ гинеколог. Иннæ персонал сты медицинон хотæ æмæ санитартæ. Рынчындоны цур ис поликлиникæ дæр.

Медицинон уагдоны сæйраг дохтыр Цхуырбаты Ульяна дзуры, уæззау рынчынты кæй аласынц Цхинвалмæ кæнæ Дзæуджыхъæумæ, уымæн æмæ Къуайсайы нæй уавæртæ рог операцитæ аразынæн дæр. Нæй дзы дохтыр-хирург дæр.

"Ахæм цаутæн нын ис реанимобиль, æмæ мах æвæстиатæй аласæм рынчыны Цхинвалмæ. Развæлгъау фехъусын кæнæм, кæй фæласæм рынчыны æмæ дохтыртæ вæййынц цæттæ. Ацы ӕзты дæргъы иу цау дæр нæ уыд, цæмæй фæфæстиат уæм, кæд горæт дæрддзæф у, уæддæр", — загъта сæйраг дохтыр.

Медицинон лæггæдтæ горæты сты æнæаргъæй, медикаментон ифтонгад ис хорз æмвæзадыл. Къуаисайы паддзахадон афтек кæй нæй, уымæ гæсгæ æнæаргъ хостæн рецепт рафыссын дохтырæн фадат нæй. Хостæ балхæнæн ис æрмæстдæр æртæ сæрмагонд афтеччы.

"Мæлынад нæм бæрзонд у, уымæн æмæ нæм цæрджыты фылдæр хай у хистæр кары адæм. Сæ 80% сты рискы къорды", — дзуры Цхуырбайы чызг.

Медперсонал дæр, æмæ цæрджытæ дæр æнæрхъæцæй æнхъæлмæ кæсынц ног рынчындоны бæстыхайы сырæзтмæ. Уыдон ныфс æвæрынц, ног рынчындонимæ кæй фæзындзæн фылдæр фадæттæ цæрджытæн гъæдджын æмæ алыварсон медицинон æххуыс кæнынæн.

Ног рынчындоны уыдзæн 10 бынаты, афтæмæй та горæты цæры 1000 адæймаджы.

Фæлæ ног бæстыхайы нæ уыдзæн хирургийы кабинет дæр, цыран уаид фадат рог операцитæ аразынæн. Афтæмæй та медицинон уагдоны штатон ранывæзты ис дыууæ хирургы бынаты. Ног бæстыхайы æххæст операцион блок куы фæзына, уæддæр дзы кусæг нæй. Горæты иу специалист дæр нæй. Нæй дзы анестезиологы бынат дæр, æнæ уымæй та иу хирург дæр не `сразы уыдзæн операци ауадзын.

"Кæддæр хирургтæй иу сфæнд кодта ам операци ауадзын — аппендикс сисын. Уæдæй фæстæмæ мах нал разы кæнæм операцитæ уадзын, уымæн æмæ цыфæнды бæрзонд специалист дæр æнæ уавæрты фæтыхсдзæн", — радзырдта сæйраг дохтыр.

© Sputnik / Ада БагианМедицинон уагдоны сæйраг дохтыр Цхуырбаты Ульяна.
Главврач больницы Квайса Ульяна Цховребова - Sputnik Хуссар Ирыстон
Медицинон уагдоны сæйраг дохтыр Цхуырбаты Ульяна.

Горæты рагæй нæй стоматолог дæр, нæй фадат аразын анализтæ, рентген, УЗИ. Ацы хъуыддæгты фæдыл цæрджытæ араст вæййынц Цхинвалмæ, кæнæ Дзæуджыхъæумæ. Дохтырты ныхæстæм гæсгæ, кæд рынчындоны фæзына нырыккон стоматологон кабинет, уæддæр дзы чи куса, уый нæй. Бынæттон рауагъдонтæй чидæртæ ахуыр кæнынц стоматологы дæсниадыл, фæлæ уыдон фæстæмæ æрæздæхой кусынмæ Къуаисамæ, уый ныфс нæй нæдæр дохтырты, нæдæр цæрджыты.

"Ис нæм УЗИ аразыны ифтонггарз, фæлæ нæй специалист, чи йыл бакуса. Ис анализатортæ дæр, фæлæ нырма æвæрд не `сты", — загъта Цхуырбайы чызг.

Рынчындоны иу радгæсон дохтыр дæр нæй, уымæ гæсгæ цæрджытæ дзурынц дохтырты сæрмагонд телефонтæм.

"Алчидæр нæ зоны, уымæ гæсгæ дохтырмæ æххуысмæ фæдзурыны фарсты проблемæ нæ сæвзæры. Фæлæ мах тынг фæнды, цæмæй ног рынчындоны алцыппæтдæр уа", — загъта сæйраг дохтыр.

Арæзтады министрады пресс-службæйы Sputnik фехъусын кодтой, ног рынчындоны бæстыхай эксплуатацимæ лæвæрд кæй æрцæудзæн фидæн азы райдианы.

Ног хабӕртты лентӕ
0