ЦХИНВАЛ, 23 окт — Sputnik, Плиты Фатимӕ. Цхинвалы консервон заводы рауадзгӕ продукци лӕзӕры уагдоны тӕрхӕджытыл, бынӕттон хӕрзад фӕткъуыйы донӕн Хуссар Иры ӕлхӕнӕг нӕ разыны. Продукцийӕн та иу азмӕ йӕ пайдакӕныны ӕмгъуыд ацӕудзӕн. Заводы куысты зындзинӕдтӕ ӕмӕ пълӕнттимӕ базонгӕ Sputnik уацхӕссӕг.
Завод йӕ фыццаг продукци рауагъта 1963 азы. Уагдоны иу сезоны хъомысад уӕды рӕстӕджы уыд 5 милуан банкӕйы, уыдон ӕхсӕн пъамидор ӕмӕ джитрийы цӕхджынтӕ, дыргътӕй цалдӕр хуыз подукци ӕмӕ 3500 тонн та дыргъ ӕмӕ гагадыргъы дон.
Ныр кӕддӕры хабӕрттӕн сӕ кой дӕр нал ис. Заводы куыст азӕй азмӕ цӕуы фӕстӕмӕ, нӕй уавӕртӕ, ӕмбӕлон ифтонггарз, фӕрӕзтӕ. Уымӕй дарддӕр ма рауадзгӕ продукци цӕрджыты ӕхсӕн нӕу популярон.
2014 азы консервон завод рауагъта продукцийы стыр парти. Бынӕттон фӕткъуыйы сыгъдӕг дон ӕнӕ уæлæмхасæнтӕй фыццаг рады ссардта йе ‘лхӕнджыты скъолатӕ, сабидӕттӕ ӕмӕ ӕндӕр уагдӕтты. 7500 ӕртӕлитрон банкӕйы уӕй ӕрцыдысты, фӕлӕ ныридӕгӕн 2014 азы рауадзгӕ партийӕ нырма заводы лӕууы 2900 банкӕйы. Уый тыххӕй заводы къухдариуӕгад ацы аз нал райста фӕткъуытӕ, уый хыгъд рауагъдад ӕрлӕууыд.
"Хъуамӕ рагацау ӕрластаин банкӕтӕ аслам аргъӕй — 9 сомӕй. Науӕд сӕ ам 25 сомӕй куы балхӕнӕм, уӕд цасы аргъ хъуамӕ скӕнӕм нӕ фӕткъуйы дон? Фӕлӕ фароны продукци нырма склады лӕзӕры ӕмӕ ма ацы аз куыд рауадзӕм?", — радзырдта Sputnik заводы директор Къацты Владимир.
Фӕткъуыйы дон заводы нырма дӕр уадзынц советон технологитӕм гӕсгӕ, нӕ йӕм ӕфтауынц нӕдӕр дон ӕмӕ сӕкӕр, нӕдӕр ӕндӕр уæлæмхасæнтӕ.
"Цы ифтонгадыл кусӕм, уый нӕм баззад 1960 азтӕй, уый фӕстӕ иу хатт дӕр ивд не ‘рцыд. Вадим Бровцев ма хицауады сӕрдар куы уыд, уӕд завод бацалцӕг кодтой, фӕлӕ аразджытӕ цӕсгомджын куыст кӕй нӕ бакодтой, уымӕ гӕсгӕ фӕстӕмӕ хӕлы", — банысан кодта директор.
Къацты Владимиры ныхӕстӕм гӕсгӕ, кӕд иу раздӕр фӕткъуыйы дон ӕлхӕдтой горӕты ӕмӕ районты скъолатӕ ӕмӕ сабидӕттӕн, уӕд ныр уыдон дӕр сӕхи нал тыхсын кӕнынц.
"Дзау ӕмӕ Ленингоры районтӕ аластой дыргъы дӕттӕ, фӕлӕ Цхинвал ӕмӕ Знауыры районтӕ сӕхи нал батыхсын кодтой, нӕ тыхсынц нӕдӕр бынӕттон раугъдадыл, нӕдӕр сыгъдӕг продукци балхӕныныл. Чысыл партитӕ аластой хъахъхъӕнынады ӕмӕ ӕнӕниздзинад хъаххъӕнынады министрӕдтӕ", — дзуры директор.
Афтӕмӕй та сабидӕттӕй кӕцыдӕрты бынӕттон продукци стӕм кӕй у, уый ныййарджыты зӕрдӕмӕ нӕ цӕуы.
"Бынӕттон заводы адджын доны ад мӕхӕдӕг зонын, у тынг хӕрзад. Уымӕй уӕлдай мӕ фидарӕй уырны, зианхӕссӕг ӕм кӕй ницы ӕфтауынц. Сабитӕ дӕр дзы уыдысты райгонд, фӕлӕ сын ӕй сӕ аходӕнтӕй цӕмӕдӕр гӕсгӕ систой", — дзуры ныййарӕг Багаты Ада.
Цхинвалы ахуыры хайады хистӕр Джиоты Агуындӕ дӕр райгонд у консервон заводы фӕткъуыйы доны ад ӕмӕ гъӕдӕй. Йӕ ныхӕстӕм гӕсгӕ, кӕд фӕткъуыйы дон нымайынц зынаргъыл, уӕддӕр ӕй ӕлхӕнынц, бынӕттон рауагъдад кӕй у, уый тыххӕй.
"Ныр ӕртӕ азы дӕргъы ӕлхӕнӕм консервон заводы фӕткъуыйы дон. Азы райдайӕны цы райстам, уыдон ма нын аххӕсдзысты цалдӕр мӕйы. Райгонд дзы стӕм, ис ын хорз гъӕд, сабиты зӕрдмӕ дӕр цӕуы, фӕлӕ 158 сомы ӕртӕлитрон банкӕйӕн, мӕнмӕ гӕсгӕ, бирӕ у. Хицауады уынаффӕмӕ гӕсгӕ, сывӕллӕттӕн аходӕны хӕрдзтӕ ныр фӕфылдӕр кодтой ӕмӕ нын ӕнцондӕр уыдзӕн ацы продукци райсын", — загъта Джиоты Агуындӕ.
Консервон заводы хистӕр ма куыд радзырдта, афтӕмӕй сӕм хъӕууон фӕллойгӕнджытӕ арӕх бахатынц сӕ фӕткъуы айсыны фӕдыл. Ивгъуыд аз уыдон фӕткъуыйы килограмм ӕлхӕдтой цӕрджытӕй 7 сомӕй. Фӕлӕ ацы аз заводы къухдариуӕгадӕн, уавӕр хынцгӕйӕ, нӕу йӕ бон бирӕ фӕткъуы балхӕнын.
"Уӕрӕсейаг 4-ӕм ӕфсӕддон базӕйы фӕндыд нӕ продукци ӕлхӕнын, фӕлӕ уыдон хъӕуы стыр партитӕ, махӕн та уыйбӕрц рауадзыны фадат нӕй. Ныфс мӕ ис, нӕ рауагъад йӕ гаччы куы сбада, уӕд та раздӕрау хӕццӕ кӕндзӕн Уӕрӕсейы бирӕ горӕттӕм", — дзуры йӕ фӕндтӕ директор.
Афтӕ ма заводы къухдариуӕгад бӕллы, цӕмӕй сӕ продукци фӕсарӕйнаг базартӕм ахиза. Фӕлӕ уый тыххӕй та. Банысан кодта директор, рауӕрӕх кӕнын хъӕуы продукцийы ассортимент ӕмӕ раивын хъӕуы ифтонгарз.
Заводы куыст сӕндидзын кӕныны фӕдыл кусджытӕ сӕ хъуыдытӕ бавдыстой хицауадмӕ, фӕлӕ ацы объект Хуссар Ирыстоны социалон-экономикон рӕзты Инвестицон нывӕзтмӕ нырма нӕ бахауд.
