ЦХИНВАЛ, 6 июл — Sputnik. Хуссар Ирыстоны къухдариуӕгад сбӕлвырд кодта, ӕртыццӕджы ӕхсӕвы паддзахадон арӕны цур цы дыууӕ ӕмбӕстаджы фесӕфтысты, уыдон кӕй разындысты Гуырдзыстоны.
Инциденттæ ма æруадзын æмæ сæ иуварс кæныны механизмты (ИÆАМ) хуссарирыстойнаг делегацийы сӕрдар Санахъоты Дауыт фехъусын кодта Sputnik, зӕгъгӕ, ныртӕккӕ цӕуы куыст ӕрцӕугӕ цау бӕстонӕй раиртасыны фӕдыл.
Цхинвалы районы Хелцуайы хъӕуы цӕрджытӕ ӕртыццӕджы фехъусын кодтой, арӕнгӕрон цӕрӕн пункт Зардиантыхъӕуы цурӕй дыууӕ хуссарирыстойнаг ӕмбӕстаджы кӕй фесӕфтысты, уыцы хабар. Чи фесӕфт, уыдонӕй иу — Бестауы фырт — у Хелцуайы цӕрӕг, аннӕ та — Багайы фырт — йӕ уазӕг Цхинвалӕй.
"Мах фӕдзырдтам Гуырдзыстоны фарсӕрдыгӕй ЕЦ ӕхсӕнадӕмон цӕстдарджытӕм ӕмӕ нын уыдон загътой, не ‘мбӕстӕгтӕ кӕй сты Гуырдзыстоны. Мах ныртӕккӕ кусӕм цау бӕстонӕй раиртасыныл", — загъта Санахъоты Дауыт.
Хъӕуы цӕрджыты ныхӕстӕм гӕсгӕ, дыууӕ нӕлгоймаджы фесӕфтысты ӕртыццӕджы ӕхсӕвы, фӕстаг хатт сӕ федтой гуырдзыстойнаг-хуссарирыстойнаг арӕны цур.
