ЦХИНВАЛ, 12 сен — Sputnik. Цхинвалы районы Къостайы хъæуы ацæудзæн ирон бæгæныйы конкурс-фестиваль "Ирон-бæгæны-2016", фехъусын кодта Sputnik культурæйы министрады пресс-секретарь Остъаты Мӕдинӕ.
Ирон ритуалон нозты æппæтирон конкурс-фестиваль цæуы ныр æтыккаг аз. Бæгæныйæн ирон адæмы хсæн уыд стыр кад, æрмæстдæр ацы нозтæй нæ фыдæлтæ куывтой Хуыцамæ, фæдзæхстой сæ бинонты, бæгæныйы куыссиимæ æмбæлдысты уазæгыл.
"Цхинвалы районы Къостайы хъæуы 15 сентябры республикæйы æппæт къуымтӕй дæсныдæр æфсинтæ ӕрбавдисдзыты сæхи арӕзт бӕгӕнытӕ. Нывæзтмæ гæсгæ, конкурс- фестивалы архайдзæн 15 бæгæныфыцæджы бæрц", — загъта уагдоны пресс-секрктарь.
Йæ ныхæстæм гæсгæ, æмрæстæджы ахæм фестивальтæ цæуынц Цæгат Ирыстоны хицæн районты ӕмӕ Самарӕйы дæр.
"Ӕрдӕгфиналты иууыл хæрзадддæр бæгæнытӕ чи сцæттæ кæна, уыдон архайдзысты Цӕгат Иры "Ирон бæгæны-2016"-ы финалы 14 октябры Тæбæхсауты Балойы номыл Ирон театры", — бафтыдта Мӕдинӕ.
Конкурс-фестиваль "Ирон-бæгæны-2016" уагъд цæуы ирон бæгæныйы цæтæ кæныны рагон технологитæ бахъахъхъæнын æмæ сæ фæсивæдæн бацамоныны нысанæн, стæй ма ирон æхсæнадты ‘хсæн бастдзинæттæ фенгомдæр кæныны оххыл.
Ирон бæгæныйы фестивалы организатортæ сты Хуссар æмæ Цæгат Ирыстоны культурæйы министрæдтæ, РЦИ Традицион культурæ æмæ этнотуризмы республикон центр "Фарн" æмæ ирон æхсæнады Самарайы регионалон хайад.
