ЦХИНВАЛ, 27 окт — Sputnik. Информацион агентад ӕмӕ радио Sputnik Хуссар Ирыстон ӕппӕт республикӕйы территорийыл райдыдта фидиуӕн FM-диапазоны ирон ӕвзагыл. Фидиуӕн цӕуы 106.3 FM улӕныл ӕмӕ йе ′сконды сты куыд ӕрвылбонон ног хабӕртты рауагъдтӕ, афтӕ тематикон программӕтӕ уӕрӕх спектры фӕдыл — Ирыстоны ӕгъдӕуттӕ, традицитӕ ӕмӕ культурӕйӕ актуалон ӕхсӕнадон-политикон фарстыты онг. Радио Sputnik алӕвӕрдтӕ ма сты сайтыл комкоммӕ эфирты ӕмӕ подкастты хуызы.
"Sputnik ног хабӕрттимӕ фадат ис базонгӕ уӕвын куыд порталыл, афтӕ ма фехъусын радиоисæнтӕй ӕппӕт Хуссар Ирыстоны. Радио Sputnik фидиуӕны хызӕг фӕуӕрӕхдӕр уыдзӕн контентӕй, кӕцы ӕнгом баст у нӕ бӕстӕйы цӕуӕг цаутимӕ. Агентады нывӕзтты ис FM-дипазоны фидиуӕны рӕстӕг фӕуӕрӕхдӕр кӕнын ӕмӕ ирон ӕмӕ уырыссаг ӕвзагыл алӕвӕрдты нымӕц фӕфылдӕр кӕнын", — загъта Sputnik Хуссар Ирыстоны къухдариуӕггӕнӕг Нарек Ордян.
Sputnik радиофидиуӕн уырыссаг ӕвзагыл райдыдта Хуссар Ирыстоны фарон апрелы. Ресурсы популярондӕр программӕтӕ сты:
— информацион-аналитикон алӕвӕрд "Без пробелов", кӕцы арӕзт у бӕстӕ ӕмӕ дунейы медиатыгъдады иууыл резонансондӕр темӕты фӕдыл дискусситы фӕлгӕтты;
— культурон- рухстауӕн программӕ "Иронэтикет", кӕцы радиохъусджыты зонгӕ кӕны ирон ӕгъдауы фыдӕлтӕй баззайгӕ нормӕтимӕ;
— рухстауӕн алӕвӕрд "Личность в фокусе", кӕцы у нывонд Ирыстоны зынгӕ гоймӕгтӕн ӕмӕ хиирхӕфсӕн алӕвӕрд "Достопримечательность дня", хуссарирыстойнаг архитектурӕйыл ӕмӕ республикӕйы тобӕгонд бынӕттыл.
Sputnik (sputniknews.com) — ног хабӕртты агентад ӕмӕ радио мультимедион информацион хабтимӕ дӕсгай бӕстӕты. Sputnik-ы сконды сты сайттӕ, аналогон ӕмӕ цифрон радиофидиуӕн, мобилон ӕмхасӕнтимӕ ӕмӕ социалон хызӕгты фӕрстимӕ. Рафысджытӕн ног хабӕртты лентӕтӕ ӕнӕхъӕн суткӕйы дӕргъы цӕуынц англисаг, арабаг, испайнаг ӕмӕ китайаг ӕвзӕгтыл.
