ЦХИНВАЛ, 31 янв — Sputnik, Плиты Фатимӕ. Мобилон уæлæмхасæнтæ "Ирон чиныг" æмæ "Базон-базон" сарæзта Цæгатирыстойнаг программист Гæбæраты Ӕхсар ӕмӕ цыбыр рӕстӕгмӕ цӕрджыты хсӕн ссисты тынг популярон.
Ногдзинады автор йӕхӕдӕг куыд фехъусын кодта Sputnik, афтӕмӕй мобилон уӕлӕмхасӕнтӕ уый сарӕзта ирон æвзаджы райрæзт æмæ парахат кæныны нысанæн.
"Базон-базон" у хъазт- викторинæ, ацы уæлæмхасæны фæрцы хъазгæйæ адæм цайдагъ кæнынц ирон æвзаг æмæ культурæйыл. "Ирон чиныджы" та ис аудиочингуытæ, аудиоспектакльтæ ирон æвзагыл, ирон литературæйы классикты уацмыстæ, адæмон таурæгътæ æмæ аргъæуттæ. Пайдагæнджытæн ма фадат ис Нарты кадджыты æххæст циклмæ байхъусын (64 радзырды)", — радзырдта Гæбæраты Ӕхсар.
Проекты хицау ма банысан кодта, аудиоӕрмæджытӕм хъусгæйæ мобилон уæлæмхасæнæй пайдагæнджытæн фадат ис тексттимæ зонгæ кæнынæн дæр. Уæлмахæсæнтæ цыбыр æмгъуыдмæ сæ телефонтæм бауагътой мингай адæймæгтæ.
"Ирон чиныг" мыхуыр æрцыд 27 январы æмæ йæ фыццаг бон сæ телефонтæм бауагътой 500 адæймаджы, ныр та сæ нымæц ахызт дыууӕ минӕй. Мобилон уæлæмхасæн телефонмæ бахæссæн ис PlayMarket-æй. Æввахс рæстæджы мæ фæнды ис ацы дыууæ уæлмхасæны размæцыдыл бакусын, стæй ма iphone-тæн дæр уæлмхассæнтæ саразыныл", — бафтыдта йӕ ныхӕстӕм программист.
Афтӕ ма Гӕбӕрайы фырт банысан кодта, уæлæмхасæнты æрмæг ӕдзухдӕр кӕй цӕудзӕн ноггонд. "Ирон чиныг"-ы æрмæг фæхъæзныг уыдзæн ирон классикты уацымстæй, кæцыты кæсынмæ æрхондзысты Ирыстоны дыууæ хайы театрты артистты.
Гӕбӕраты Ӕхсар мадӕлон ӕвзагмӕ уарзондзинад банкъардта сывӕллоны бонтӕй, бинонтӕ иууылдӕр уыдысты ирон ӕвзаг иртасджытӕ. Йӕ фыд Феликс у Гӕбӕраты мыггаджы тыххӕй чиныджы автор, уӕлӕмхасӕн "Базон-базон"-æн фарстытæ дӕр уый бацӕттӕ кодта. Йӕ фыды ӕфсымӕр — дзӕнӕттаг Гӕбӕраты Никъала — ирзонынады ирддӕр стъалытӕй иу. Ныр йæ фыдæлты хъуыддаг ныры дуджы домæнтæ хынцгæйæ дарддæр кæны Ӕхсар дӕр.
