ЦХИНВАЛ, 7 дек — Sputnik, Козаты Диана. Хуссар Ирыстоны политикон партитӕ ӕмӕ ӕхсӕнадон организацитӕ арвыстой республикӕйы генералон прокурормӕ коллективон куырдиат, цыран курынц бастдзинады комитеты раздӕры сӕргълӕууӕг Къӕбысты Георгийы ӕмӕ Джиоты Мирианы ссӕрибар кӕнын ахӕстонӕй.
Цхинвалы горӕттаг тӕрхондон дыццӕджы адарддӕр кодта ноджы дыууӕ мӕймӕ Къӕбысты Георгийы ӕмӕ Джиоты Мирианы ахӕст. Ӕрӕджы уыдонӕн фӕдзӕхсты слӕууыдысты Хуссар Ирыстоны ӕртӕ экс-президенты, фӕлӕ уӕддӕр сӕ уӕддӕр нӕ рауагътой.
Куырдиаты бын сӕ къухфысттӕ чи сӕвӕрдта, уыдон банысан кодтой, Къӕбысты Георгий республикӕйы зындгонд кӕй у, куыд раст, намысджын ӕмӕ принципиалон адӕймаг, Ирыстоны патриот ӕмӕ хъахъхъӕнӕг, ис ын стыр цыт фӕсивӕды хсӕн".
Уыдон ранымадтой Къӕбысты Георгийы сгуыхтдзинӕдтӕ ӕмӕ бахахх кодтой, 2004 ӕмӕ 2008 ӕзты хӕстыты рӕстӕджы Георгийы фӕрцы, кӕцы ифтонг кодта республикӕ бастдзинадӕй, кӕй не рцыд бирӕ фылдӕр уды зиӕнттӕ.
"Къæбысты Георгий æмæ Джиоты Мирианы цæй мидæг азым кæнынц, уыдонæн нæ аргъгæнгæйæ, нымайæм, ахæсты дарын сæм кæй не ʻмбæлы, куыд уæззау фыдракæндтæ саразджытæм. Уырны нæ, Георгий æмæ Мириан, кæцытæ æд хæцæнгарз хъахъхъæдтой Ирыстон иууыл уæззаудæр рæстæджыты, сæхи нæ баууон кæндзысты сгарджытæй", — банысан кодтой политиктæ æмæ æхсæнадон архайджытæ сæ иумæйаг сидты.
Уыдон ма бахахх кодтой, Георгий æмæ Мирианы сæхицæй тынгдæр кæй никæй фæнды, цæмæй рæстдзинад сбæлвырд уа æмæ сгарджытæ рафæлгъауой ацы æнæбындур азымгæнæнтæ.
Куырдиатыл сæ къухфыстытæ сæвæрдтой æртæ парламентон парти — "Ныхас", "Адæмон парти" æмæ "Адæмы иудзинад", афтæ ма партитæ "Фидæн" æмæ "Ног Ирыстон"-ы раздзогтæ. Уыдонмæ ма бамбал сты Фыдыбæстæ хахъхъæнджыты цæдис æмæ Орден "Уацамонгæйы" кавалерты цæдис.
