ЦХИНВАЛ, 19 янв— Sputnik. Хуссар Ирыстоны æххæстгæнæн хицауады органтæ аразынц социалон нысаниуæгджын объектты реестр, кæцытæ хъуамæ æрцæуой ифтонг резервон энергийæ. Бæрæггæнæнтæ æрвыст æрцæудзысты Цæгат Кавказы хъуыддæгты фæдыл уæрæсейаг министрадмæ республикæ 25 мегаваттон газытурбинæйон генераторæй сифтонг кæныны фæлгæтты, хъусын кæны РХИ-ы хицауады пресс-службæ.
"Хъæуы æмбарын, стыр хъомыстимæ генераторты æвæрыны хъуыддаг минутон хъуыддаг кæй нæу. Уый фæдыл хъæуы лæмбынæг куыст бакæнын, куыд техникон документацийы, афтæ монтажы бынат равзарыны фæдыл дæр. Нырма уал УФ-йы хицауады сæрдары хæдивæг Александр Хлопонины хæслæвæрдмæ гæсгæ, æмбырд цæуы информаци Кавказы хъуыддæгты фæдыл министрадæн Хуссар Ирыстоны территорийыл социалон нысаниуæгджын объектты нымæцы тыххæй", — хъусын кæны пресс-службæ Хуссар Ирыстоны премьер-министр Пухаты Эрикы ныхæстæ.
Премьер банысан кодта, номхыгъдмæ кæй бацыдысты бастдзинады объекттæ, телеуынынады, ЦКХ-ы къабазы элементтæ, социалон нысаниуæгджын объекттæ, æнæниниздзинад хъахъхъæнынадон, ахуырадон, кондадон объекттæ æмæ афтæ дарддæр.
Пухаты Эрик куыд банысан кодта, афтæмæй Кавказы хъуыддæгты фæдыл министрадмæ информаци æрвыст æрцæудзæн æввахсдæр рæстæджы.
