15:09 26 ЗÆРДÆВÆРÆНЫ МÆЙ
 2018
Комкоммӕ эфир
  • EUR72.12
  • USD61.67
Sputnik пресс-центры ацыд Владимир Высоцкийы сфæлдыстадон изæр

Sputnik пресс-центры ацыд Владимир Высоцкийы сфæлдыстадон изæр

© Sputnik / Наталья Айриян
Хуссар Ирыстоны
Чысыл дӕнцӕг
15 0 0

Высоцкийы райгуырдыл 80 азы сæххæстæн нывонд мадзалы, айзæлдысты зындгонд советон автор æмæ зарæггæнæджы зарджытæ æмæ æмдзæвгæтæ

ЦХИНВАЛ, 26 янв— Sputnik, Уалыты Диана. Sputnik Хуссар Ирыстоны пресс-центры ацыд Владимир Выцоцкийы райгуырдыл 80 азы сæххæстæн нывонд мадзал. Йæ æмкъурсон, адæмон артисткæ Гугкаты Эвелина адих кодта йæ мысæнтæ егъау поэт æмæ музыканты тыххæй.

"Высоцкий уыд ныллæг, сæрхызт, фæлæ уыд тынг хæлар нæ ирон лæппутимæ æмæ уарзта иронау зарын. Удыгас куы уаид, уæд ын æхсызгон уаид, ам æй кæй нæ ферох кодтой. Высоцкий бæрзонд аргъ кодта Къостайы æмдзæвгæтæн, уый та уый нысан у, æмæ уарзта Ирыстоны дæр. Иууыл кодта заргæ, дзырдта тынг цъус – уый та у хъæзныг миддунеимæ адæймаджы миниуæг", — радзырдта Эвелина.

Аивæдты сгуыхт архайæг Валерий Авагимов музыканты юбилеймæ сæххæст кодта Высоцкийы æмдзæвгæтыл фыст зарджытæ æмæ банысан кодта, фылдæр Высоцкийы фæрцы кæй ссис бард дæр.

"Мах, зынгæ ирон зарæггæнæг, мæ хæлар Сагкаты Валериимæ нæ æрыгон бонты фæлвæрдтам Высоцкийы хъæлæс фæзмынын æмæ удцырын истам Высоцкийы сфæлдыстадæй", — загъта уый.

Изæры ма хайад райста музыкант Андрей Курило горæт Геленджикæй, кæцы фыццаг хатт æрцыд Хуссар Ирыстонмæ.

"Высоцкийы тыххæй бирæ ныхæстæ загъд æрцыд, уый уыд æмæ баззад бирæтæн дæнцæг. Ӕз дæр хъомыл кодтон ацы зарджытыл æмæ йын бæрзонд аргъ кæнын йе сфæлдыстадæн", — загъта уый.

Мадзалы хайад райстой фæсивæды минæвæрттæ дæр – Хуссар Ирыстоны паддзахадон университеты студенткæ Тедеты Салима бакаст уарзон поэты æмдзæвгæтæ æмæ радзырдта, Высоцкийы поэзи кæй бауарзта йæ фыды фæрцы.

Изæр ацыд хъарм хæларадон уавæры, уазджытæ дзырдтой сæ мысинæгтæ Высоцкийы сфæлдыстады æмæ цы роль ахъазыд сæ царды, уый тыххæй.

Мадзалы кæрон Sputnik Хуссар Ирыстоны къухдариуæггæнæг Виталий Раднаев загъта бузныг æрæмбырдуæвджытæн, кæй ссардтой рæстæг æмæ кæй æрбамбал сты юбилейон изæрмæ.

"Мах арæхдæр араздзыстæм ахæм сфæлдыстадон изæртæ. Мæ нымадмæ гæсгæ, абон уыд хорз традицийы райдиан. Ӕхсызгон нын у сымах уынын Sputnik Хуссар Ирыстоны пресс-центры æмæ нæ ныфс ис арæхдæр фембæлдтæй ахæм хорз уавæры", — загъта уый.

Сӕйраг темӕтӕ