ЦХИНВАЛ, 1 фев — Sputnik, Уалыты Диана. Хуссар Ирыстоны Зонадон-Иртасæн иституты кусджытæн сæ профессионалон бæрæгбоны цытæн раарфæ кодта Хуссар Ирыстоны президент Бибылты Анатолий, Зонады бонæн нывонд мадзалы рæстæджы. Президент загъта бузныг ахуыргæндтæн сæ удуæлдай куысты тыххæй æмæ банысан кодта докладты темæтæ иууылдæр кæй уыдысты цымыдисон.
"Ӕнæ зонад æмæ ахуыргонд адæмæй не 'хсæнадæн нæй фидæн. Мах кæндзыстæм алыварсон æххуыс зонады райрæзтæн. Кусæгон балцтæ æмæ стажировкæты тыххæй та зæгъдзыстæм, мах алыхатт дæр кæй æххуыс кæндзыстæм æрыгон ахуыргæндтæн сæ професионалон миниуджыты райрæзтæн", — бафтыдта уый.
Зонадон-иртасæн институты директор Гаглойты Роберт дæр раарфæ кодта йæ коллегæтæн бæрæгбоны цытæн æмæ загъта бузныг хицауадæн йæ хъусдарды тыххæй зонады къабазмæ.
"Зонады бон у нæ иумæйаг бæрæгбон. Ӕз дæн бузныг хицауадæй, кæцы нæм дары йæ хъус æмæ нымайы хорзыл нæ хъæппæристæ иууылдæр", — загъта уый.
Ахуыргæндтæн сæ бæрæгбоны фæдыл раарфæ кодта Хуссар Ирыстоны Ветеранты советы сæргълæууæджы хæдивæг Уалыты Гайоз, кæцы банысан кодта гуырдзиаг-ирон хъаугъайы историйы зонадон иртасæны ахсджиаг роль. Уалыты Гайоз балæвар кодта институты кусджытæн чиныг – "Гыццыл адæмы стыр трагеди", 2008 азы августы цауты цæстæйфенджыты мысæнтимæ.
Конференцийы докладгæнджытæ дзырдтой ирон æвзаг æмæ литературæ, политикæ, истори æмæ мифологийы темæты ахсджиаг фарстытыл. Алы раныхасы фæстæ дæр-иу бацайдагъ дискусси, æрæмбырдуæвджытæ дæттой фарстытæ æмæ дзырдтой сæ хъуыдытæ докладты фæдыл.
Конференцийы кæронбæттæны раныхас кодта президенты æххæстбарджын минæвар, историк Джиоты Мурæт, кæцы загъта бузныг хайадисджытæн цымыдисон темæты тыххæй æмæ банысан кодта ахæм мадзæлтты ахсджиаг роль.
