ЦХИНВАЛ, 5 фев — Sputnik, Уалыты Диана. Психологимæ чи цымыдис кæны, уыдонæн лекциты курс райдыдта Анахарсисы номыл республикон библиотекæйы залы Хуссар Ирыстоны столицæйы.
Хуссар Ирыстоны Паддзахадон университеты хистæр ахуыргæнæг Гæбулты Индира ахуырты рæстæджы агайы æхсæнады актуалон темæтæ æмæ адæймаджы индивидуалон проблемæтæ, кæцытæ аскъуыддзаг кæнынæн æххуыс кæны психологи.
Гæбулты Индирайы ныхæстæм гæсгæ, æввахс рæстæджы баконд æрцæудзæн практикон психологийы скъола, цæмæй алы адæймагæн дæр уа фадат йæхицæн баххуыс кæнын.
"Тынг бирæ адæмы психологон æххуыс кæй хъæуы, уый хынцгæйæ, æз мæхи хъæппæрисæй райдыдтон уадзын ахуыртæ. Тагъд рæстæджы бакæндзыстæм скъола дæр, ахуыры программæ ныридæгæн у цæттæ. Махмæ нæй практикон психологтæ, кæцытæ æххуыс кæниккой цæрджытæн æмæ кусиккой алыхуызон проблемæтимæ адæмимæ, уымæ гæсгæ нын ахæм ахуыртæ сты æнæмæнгхъæуæг", — загъта уый.
Фыццаг лекци ацыд 1 февралы, кæцыйы рæстæджы Индира радзырдта, дæргъвæтин хæстон æзты фæстæ Хуссар Ирыстоны тынг кæй фæцудыдта цæрджыты эмоционалон уавæр, уымæ гæсгæ адæмимæ хъæуы кусын. Ахуыр ацыд диалогы хуызы, æрбацæуджытæ активон хайад истой дискусситы æмæ дзырдтой, цы темæтæ сæ тыхсын кæнынц, уыдоныл.
Лекцитæм æрбацæуджытæй иу, ХИПУ-ы психологийы факультеты студент, банысан кодта, уый кæй у актуалон фадат ахæм адæмæн, кæцыты хъæуы æххуыс.
"Хæст æмæ йæ фæстæ æзты цы хъизæмæрттæ бавзæрстам, уый фæстæ ацы хъуыддаг у хæрзиуæгон æмæ пайдаджын, уымæн æмæ ам нæй консультаци цы психологæй ис райсæн, ахæмтæ. Мæ хъуыдымæ гæсгæ, уый у æнæмæнгхъæуæг цæрджытæн. Лекци ацыд тынг цымыдисон, адæм активон хайад истой дискусситы æмæ сæ алчидæр рахаста цавæрдæр пайда йæхицæн", — загъта уый.
