ЦХИНВАЛ, 4 апр — Sputnik, Плиты Фатимæ. Хуссар Ирыстоны иунæг сывæллæтты хæдзары хъомылгæнинæгтæн Ленингорæй балц сарæзтой пятигорскаг цæугæ зоопарк "Король Лев"-мæ Цхинвалмæ. Ацы сывæллæттæн уый ссис сæ фыццаг фембæлд æнахуыр сырдтимæ.
Уазæг зоопаркæн æппæт регионты дæр йæ дуæрттæ сты гом сидзæр сывæллæтты хæдзæртты хъомылгæнинæгтæн, сахъат сабитæн.
Йæ директор Артур Мусаеляны ныхæстæм гæсгæ, уыдон бирæ регионтæй райсынц бузныджы гæххæтытæ дæр. Ӕртыццæджы фадатæй спайда кодтой Ленингоры сывæллæтты хæдзар дæр.
"Сывæллæттæ фыццаг хатт уыдысты зоопарчы, тынг райгондæй баззадыстæм", — загъта сывæллæтты хæдзары хъомылгæнæг Чысиаты Эльза.
Сырдтимæ фембæлды фæстæ сывæллæтты парти "Иугонд Ирыстон" ахуыдта кафе "Vincenzo"-мæ.
Зоопаркмæ билеты аргъ лæууы хистæртæн 200 сомы, сабитæн — 150, æртæ азы онг кæстæртæн та æнæаргъæй.
Республикæйы ныр 20 азæй фылдæр никуы уыд зоопарк. Каубыд чырынты ис 25 сырды.
