ЦХИНВАЛ, 3 авг — Sputnik. Уӕрӕсе ӕмӕ Хуссар Ирыстон ӕввахс рӕстӕджы бафысдзысты бадзырд республикӕйы ӕнахъом ӕмбӕстӕгты ахуыры тыххӕй уӕрӕсейаг ӕфсӕддон ахуыргӕнӕндӕтты, фехъусын кодтой хуссарирыстойнаг хъахъхъӕнынадон уагдоны пресс-службӕйы.
Ахӕм хъӕппӕрисимӕ ралӕууыд Хуссар Ирыстоны хъахъхъӕнынады министр Гассеты Ибрагим йӕ уӕрӕсейаг коллегӕ Сергей Шойгуимӕ фембӕлды рӕстӕджы 2017 азы, хъахъхъӕнынады уагдӕтты сӕргълӕуджытӕ куы бафыстой бадзырд хуссарирыстойнаг ӕфсады хицӕн хайадты Уӕрӕсейы ӕфсады скондмӕ бахизӕны тыххӕй, уӕд.
"Хуссар Ирыстоны ӕнахъом ӕмбӕстӕгтӕ ахуыр кӕндзысты Уӕрӕсейы хъахъхъӕнынады министрады ахуыргӕнӕндӕтты. Ахӕм уынаффӕ рахаста Уӕрӕсейы Федерацийы хицауад июлы", — радзырдтой хъахъхъӕнынады министрады.
Бадзырд бафыссын републикӕйы хицауады номӕй хъахъхъӕнынады министрады бавджид кодта РХИ президент Бибылты Анатолий.
