Цхинвайлаг шофыртӕ та хъаст кӕнынц бензины гъӕдӕй

© Sputnik / Алексей Мальгавко /  Ахизын медиабанкмæЦхинвалы ӕртагкӕнӕн станц
Цхинвалы ӕртагкӕнӕн станц - Sputnik Хуссар Ирыстон
Рафыссын
Хуссар Ирыстоны шофыртӕ сӕ хӕдтулгӕты фехӕлыны аххосаг уынынц ӕртаджы гъӕдыл – стандартизаци ӕмӕ метрологийы комитеты радзырдтой, куыд ӕххӕст кӕнынц хъусдард ӕртаджы гъӕдмӕ

ЦХИНВАЛ, 10 окт — Sputnik, Козаты Диана. Социалон хызӕг Facebook-ы пайдагӕнджытӕ фӕдзӕхсынц шофырты, цӕмӕй сӕ хӕдтулгӕты кӕной бензин бӕлвырдгонд бынӕтты. Уыдон дзурынц, республикӕйы кӕй фӕзынд бензин биоэтанолы бындурыл, кӕцы халы хӕдтулгӕты ӕмӕ ӕндӕр техникӕ. Фӕлӕ дырысӕй ничи загъта, кӕцы ӕртаггӕнӕн станцты ис ӕвзӕр бензин.

Хуссарирыстойнаг шофыртӕ арӕх хъаст кӕнынц республикӕйы ӕртаджы гъӕдӕй. Ӕвзӕр бензин уыдон нымайынц сӕ хӕдтулгӕты фехӕлды аххосаг.

Хуссар Ирыстоны ӕртаджы гъӕдмӕ хъусдард ӕххӕст кӕны стандартизаци ӕмӕ метрологийы комитет. Законмӕ гӕсгӕ, уагдонӕн ис бар сгарын ӕртаггӕнӕн станцтӕ аз иу хатт, фӕлӕ сӕм официалон хъаст куы ӕрбацӕуа, уӕд комитеты кусджытӕн ис бар кӕдфӕндыдӕр бацӕуын ӕмӕ ауадзын басгӕрст.

"Амӕйразмӕ нӕм бадзырдтой цхинвайлаг микрорайон "Шанхай"-мӕ бацӕуӕны ӕртаггӕнӕн станцы бензины ӕвзӕр гъӕды фӕдыл хъастимӕ. Мах уайтагъд ацыдыстӕм уырдӕм, ӕмӕ алцыдӕр разынд хорз. Фыссын ис гӕнӕн алцыдӕр, фӕлӕ махӕн нӕ бон нӕу алы ахӕм цауы фӕстӕ дӕр цӕуын ӕртаггӕнӕн станцтӕм басгӕрстимӕ", — загъта комитеты сӕрдар Цхуырбаты Зауыр.

Фӕлӕ вӕййы цаутӕ, уагдоны кусджытӕ ахӕм хъастты фӕстӕ дӕр куы бацӕуынц сгарынмӕ.

Цхуырбаты Зауыр радзырдта, зӕгъгӕ, бирӕ шофыртӕ барӕй схонынц сӕ хӕдтулгӕйы фехӕлды аххосаг бензины ӕвзӕр гъӕд. Ахӕм цауы фӕстӕ комитеты специалисттӕ алцыдӕр лӕмбынӕг басгарынц.

Автозаправочные станции Газпромнефть в Омске - Sputnik Хуссар Ирыстон
ПӔК æрцахста "Югосетнефтепродукт"-ы къухдариуæггæнджыты

Куы рабӕрӕг уа, амалиуӕггӕнджытӕ кӕй уӕй кӕнынц ӕртаг ӕвзӕр гъӕдимӕ, уӕд уыдоны фӕивар кӕндзысты 20-100 мин сомы бӕрц. Комитеты сӕрдар загъта, зӕгъгӕ, ныридӕгӕн уыд цалдӕр ахӕм цауы.

Раздӕр комитет ӕрвыста ӕртаг Ставропольмӕ, цы ран ис ӕнӕхъӕн Цӕгат Кавказы иунӕг лаборатори, кӕцыйы ис гӕнӕн саразын анализ. Ныр та уагдонӕн йӕхимӕ ис ӕмбӕлгӕ ифтонгад, фӕлӕ кӕд хъуыддаг бадӕттой тӕрхондонмӕ, уӕд бынӕттон гарзӕджы фӕстиуджытӕ фаг не сты. Хъӕудзӕн та сӕ арвитын Уӕрӕсемӕ.

"Уый у тынг зынаргъ ифтонгад, йӕ аргъ у ӕхсӕз милуан сомы, махмӕ та ныртӕккӕ ахӕм фӕрӕзтӕ нӕй", — фехъусын кодта Цхуырбаты Зауыр.

Фарон Хуссар Ирыстоны Паддзахадон ӕдасдзинады комитет ӕрцахста ӕртагимӕ цистернӕтӕ "Югосетнефтепродукт"-ы территорийыл.

Уагдоны информацимӕ гӕсгӕ, АИ 92 бензины бӕсты республикӕмӕ ластой бензин ӕвзӕр гъӕдимӕ. Иу мӕйы фӕстӕ ӕрцахстой амалиуӕгады раздӕры сӕрдар Тыджыты Владимиры, кӕцымӕ зӕрдӕ ӕхсайдта "Югосетнефтепродукт"-ы фӕрӕзтӕ адавыны фӕдыл.

ПӔК фехъусын кодтой, зӕгъгӕ фесты сӕ басгӕрст, цӕмӕй сбӕрӕг кӕной гоймӕгты, кӕцытӕ ластой бензин ӕвзӕр гъӕдимӕ республикӕмӕ.

"Югосетнефтепродукт"-ӕй дарддӕр ма республикӕйы кусынц 20 сӕрмагонд ӕртаджы станцӕй фылдӕр.

Ног хабӕртты лентӕ
0