ЦХИНВАЛ, 9 ноя — Sputnik. Хуссар Ирыстоны президент рахаста уынаффӕ баххуыс кӕнын бинонтӕн, кӕцытӕ сты зын цардуагон уавӕрты, хъусын кӕны паддзахады сӕргълӕууӕджы пресс-службӕ.
Уагдоны банысан кодтой, зӕгъгӕ, 5-9 ноябры президент райста ӕмбӕстӕгты ӕмӕ ӕркаст 15 адӕймаджы куырдиатмӕ, кӕцыты проблемӕтӕ баст сты цӕрӕнуатимӕ.
Цхинвалы районы Присы хъӕуы цӕрӕг Пухаты Ксения радзырдта президентӕн йӕ уӕззау уавӕры тыххӕй — йӕ чызг ӕмӕ лӕппу амардысты гуырдзиаг агрессийы алыгъуызон периодты, 2008 азы та йӕ хӕдзар ныппырх артиллерион нӕмыгӕй. Пухаты Ксения бахатыд, цӕмӕй йын йӕ хӕдзар сцалцӕг кӕной.
Бибылты Анатолий бавджид кодта ӕркӕсын ацы уавӕрмӕ, уый фӕстӕ аскъуыддзаг кӕндзысты хӕдзар ногӕй саразын, кӕнӕ та йӕ сцалцӕг кӕнын.
Уӕззау уавӕры сты Цхинвалы районы Къусреты хъӕуы цӕрӕг Дзабиты Луизайы бинонтӕ дӕр, йӕ бинойнаг Битеты Павел сӕ лӕппуимӕ, кӕцы у 1 къорды инвалид. Уыдонӕн дӕр сӕ хӕдзар бахъыгдард ис хӕсты рӕстӕджы, йӕ лӕппуйӕн та йӕ бон змӕлын нӕу ӕмӕ йӕ хъӕуы инвалидон къаласкъӕ.
Президент дзырд радта Джабиты Луизайӕн, йӕ хӕдзары арӕзтад кӕй райдайдзӕн иннӕ аз. Афтӕ ма уый бавджид кодта балхӕнын инвалидон къаласкъӕ ӕмӕ хостӕ.
Къостайы хъӕуы цӕрӕг Дзудты Галинайы хӕдзары арӕзтад дӕр райдайдзӕн 2019 азы.
"Мах ныридӕгӕн сарӕзтам цалдӕр хӕдзар Къостайы хъӕуы, сараздзыстӕм дӕуӕн дӕр", — баныфс ӕвӕрдта президент.
Сцалцӕг кодтой Цхуырбаты Хасаны хӕдзар дӕр, кӕцы йӕ бинонтимӕ — фараст адӕймагӕй — цӕры Дзауы районы Хслебы хъӕуы.
Дменисы хъӕуы цӕрӕг Джиголаты Сенотайы куырдиат цӕрӕн вагон рахицӕн кӕныны тыххӕй Бибылты Анатолий барвыста "Иугонд Ирыстон" партийы лидер Тадтаты Аланмӕ.
"Парти "Иугонд Ирыстон" иудадзыг ӕххӕст кӕны ахӕм ӕххуыс районты цӕрджытӕн. Ӕз ракурдзӕн, цӕмӕй Дӕуӕн дӕр рахицӕн кӕной вагон", — загъта президент.
Болататы Хатуна радзырдта, экспертизӕйы фӕстиуджытӕм гӕсгӕ Цхинвалы Хъайтарты уынгыл йӕ хӕдзар кӕй ныппырх 71 проценты бӕрц, ӕмӕ абон уый цӕры ныккӕнды.
Бибылты Анатолий бавджид кодта сӕххӕст кӕнын хӕдзары цалцӕггӕнӕн куыстытӕ. Ахӕм фӕдзӕхст уый радта Кӕсӕбиты Линдайы хӕдзары тыххӕй дӕр, кӕцы цӕры Уӕлахизы уынгыл, афтӕ ма Тедиашвили Тинайы хӕдзары тыххӕй дӕр.
