ЦХИНВАЛ, 14 ноя — Sputnik, Плиты Фатимæ. Хуссар Ирыстоны культурæйы министрады дæлбар адæмон сфæлдыстады центр хоны хæдархайгæ æмæ хореографион къордты адæмон кафты III-аг конкурс-фестиваль "Ирон кафт"-мæ, фехъусын кодта Sputnik центры пресс-секретарь Къæбысты Зæринæ.
Конкурсмæ куырдиæттæ ист цæудзысты 20 ноябрьмæ Адæмон сфæлдыстады центры.
"Адæмон кафты фестиваль-конкурсы хайад райсыны бар ис горæттæ æмæ районты хæдархайгæ æмæ хореографион къордтæ, стæй ма хореографион скъола-студитæн. Уагæвæрдмæ гæсгæ алкæцы къорд дæр хъуамæ сæххæст кæна "Зилгæ кафт", уымæ гæсгæ сын аргъ кæндзæн жюри. Ноджы ма иу кафт та сæххæст кæндзысты сæхи æвзæрстмæ гæсгæ", — загъта Къæбысты Зæринæ.
Конкурс-фестиваль "Ирон кафт" ацæудзæн 2 декабры ПККЗ "Чермен"-ы. Æппæт къордтæ дæр райсдзысты хайадисæджы дипломтæ æмæ зæрдылдарæн лæвæрттæ, хуыздæр чи радæтта ирон кафты сусæгдзинæдтæ, уыдонмæ та æнхъæлмæ кæсынц уæлæмхас призтæ.