ЦХИНВАЛ, 15 ноя — Sputnik, Уалыты Диана. Хъотайты Григорийы номыл хуссарирыстойнаг культурон фонды уӕнг, аивадон зонӕдты кандидат Плиты Маргарита хайад исы III зонадон-практикон конференци "Культурӕйы бавӕрд. Иртасӕнтӕ ӕмӕ реставраци"-йы. Конференцийыл, кӕцы уагъд цӕуы Vll Ӕхсӕнадӕмон культурон форумы фӕлгӕтты Санкт-Петербурджы 15-17 ноябры, аивадзонӕг Ирыстонӕй ралӕудзӕн докладимӕ, йӕ темӕ у "Тугъанты Махарбеджы номыл Республикӕ Цӕгат Ирыстоны Аивадон музей ӕмӕ Республикӕ Хуссар Ирыстоны Национ музейы экспонатты сӕндидзӕн".
Культурон фонды сӕргълӕууӕг Хъотайты Елена радзырдта, куыст нывонд кӕй у Тугъанты Махарбеджы номыл Цӕгат Ирыстоны Аивадон музей ӕмӕ Хуссар Ирыстоны Национ музейы культурӕйы цыртытӕ бавӕрынӕн, кӕцытӕ сты ирон адӕмы бындур.
"Бирӕ рӕстӕг музейтӕн ӕххуыс кодтой ӕрмӕстдӕр Мӕскуы ӕмӕ Санкт-Петербургӕй специалисттӕ. 1990 азӕй фӕстӕмӕ Тугъанты Махарбеджы номыл музейы кусынц ирон реставратортӕ дӕр — Пораты Руслан ӕмӕ Кцойты Юрий. Уыдон среставраци кодтой сурӕтгӕнӕн аивады бирӕ куыстытӕ, кӕцытӕ ногӕй бахызтысты музейы экспозицимӕ. Хуссар Ирыстоны Национ музейы ног агъуыст радтой эксплуатацимӕ 2015 азы. Фӕлӕ гуырдзиаг агрессийы рӕстӕджы дӕр куыстой экспонаттӕ бавӕрыныл. 2010 азы нывгӕнӕг Кацты Вадим аласта 30 экспонатӕй фылдӕр реставрацимӕ, кӕцытӕ абон ӕрыздӕхтой муземӕ", — загъта уый.
Хъотайты Елена бафтыдта, зӕгъгӕ, Плиты Маргарита форумы хайад исы, цӕмӕй ӕрбаздаха хъусдард ацы проблемӕмӕ ӕмӕ республикӕйы профессионалон реставраторты цӕттӕкӕнынады фарстмӕ.
