ЦХИНВАЛ, 27 ноя — Sputnik, Козаты Диана. Уӕрӕсейаг ахуыргӕнӕндӕттӕ 2017-2018 ӕзты рахицӕн кодтой Хуссар Ирыстонӕн 18 квотӕ, иннӕ аз сӕ нымӕц къаддӕр нӕ уыдзӕн, радзырдта журналисттӕн Россотрудничествойы минӕварады сӕргълӕууӕг Сергей Скворцов.
"Фарон Хуссар Ирыстонӕн рахицӕн кодтой 18 квотӕ уӕрӕсейаг ахуыргӕнӕндӕтты, ацы сӕ нымӕц къаддӕр нӕ уыдзӕн, фӕлӕ бирӕ фылдӕр дӕр нӕ уыдзысты", — загъта уый.
Россотрудничество минӕварады сӕргълӕууӕджы ныхӕстӕм гӕсгӕ, ацы здӕхтыл куыст цӕуы республикӕйы хицауадимӕ иумӕ.
"Махӕн ратдзысты ахӕм дӕсниадты квотӕтӕ, кӕцытӕ уыдзысты ӕнӕмӕнгхъӕугӕ Хуссар Ирыстоны фондз азы фӕстӕ, цӕмӕй республикӕ радта куыстбынӕттӕ рауагъдонтӕн", — банысан кодта Сергей Скворцов.
Скворцовы ныхӕстӕм гӕсгӕ, ивгъуыд ӕзтӕм абаргӕйӕ Хуссар Ирыстонӕн квотӕты нымӕц фӕкъаддӕр ис, фӕлӕ уый алыхатт дӕр афтӕ нӕ уыдзӕн.
"Республикӕйы сарӕзтой иттӕг хорз университет, уым цӕттӕ кӕнынц специалистты. Раст нӕ уыдзӕн, мах куы исӕм хуссарирыстойнаг университетӕй адӕмы, кӕцыты сӕхӕдӕг дӕр бацӕттӕ кӕндзысты", — загъта минӕварады сӕргълӕууӕг.
Сергей Скворцов бахахх кодта, зӕгъгӕ, иннӕ аз Россотрудничество Хуссар Ирыстоны хицауадимӕ иумӕ развӕлгъау бацӕттӕ кӕндзысты ӕнӕмӕнгхъӕугӕ професситы номхыгъд.
Скворцов бафтыдта, квота райсын кӕй фӕнды, уыдон сӕ хъус кӕй дарой Хуссар Ирыстоны Россотрудничествойы минӕварады сайтыл ног хабӕрттӕм.
