ЦХИНВАЛ, 5 июн— Sputnik, Плиты Фатимæ. Культурæйы министрады адæмон сфæлдыстады центр хъусын кæны фæндзæм æппæтреспубликон æрвылазон конкурс "Южная Осетия —2019"-мæ куырдиæттæ исыны тыххæй. Конкурс цæуы æртæ номинацийы, фехъусын кодта Sputnik центры кусæг Къæбысты Зæринæ.
Куыстытæ ист цæудзысты 9 августмæ, конкурсæн хатдзæгтæ скæндзысты 16 августы, уый фæстæ хуыздæр куыстытæ рахæсдзысты адæмы размæ равдыстмæ.
"Фотоконкурсы хатдзæгтæм гæсгæ августы Къостайы цырты цур Цхинвалы ацæудзæн куыстыты равдыст. Мадзал нывонд уыдзæн бæрæгбонон датæйæн —Хæдбардзинады банымады бонæн. Ам фæбæрæг уыдзысты хуыздæр куыстыты автортæ, арæхстджындæр къамисджытæ райсдзысты дипломтæ, грамотæтæ æмæ лæвæрттæ", — банысан кодта Къæбысты Зæринæ.
Уый ма бафтыдта, фæндзæм юбилейон конкурсы кæй фæзындзæн ног номинаци "Хуссар Ир цæсгæмтты".
"Ивгъуыд æзты уыд фылдæр номинацитæ – "пейзаж", "хуызист", "Цхинвал абон", "цыртдзæвæнтæ", "Хуссар Иры фенддаг бынæттæ", "райгуырæн бæстæйы флора æмæ фауна". Ацы аз дзы цыппарæй рацух стæм æмæ бафтыдтам ног номинаци "Хуссар Ир цæсгæмтты", раздæрау ма дзы баззайдзæн "Цхинвал абон" æмæ "Хуссар Иры фенддаг бынæттæ", - загъта уый.
Фарон конкурсы уæлахиздзаутæ хицæн номинациты ссисты Гасситы Зæринæ, Къæбулты Ӕхсар, Мæргъиты Ирбег, Бестауты Лариса.
Адæмон сфæлдыстады центр фотоконкурс уадзы фæндзæм аз. Фыццаг сæ тыхтæ бафæлвæрдтой 2014 азы. Хицæн азты конкурсы расгуыхтысты къамисджытæ Гæбæраты Нелли, Габайты Владимир, Хуыгаты Ростислав, Гæззаты Тимур æмæ æндæртæ.
